काठमाडौं । नेकपा एमालेका बरिष्ठ उपाध्यक्ष ईश्वर पोखरेलले अध्यक्ष केपी शर्मा ओली भदौ २३ र २४ को घटना छानबिन गर्न बनेको आयोगमा बयान दिन जानुपर्ने बताएका छन् । आज (बुधबार) पोखरेलले पत्रकारहरुसँग अन्तरक्रिया गर्दै आफू भएको भए आयोगमा बयान दिन जाने बताए । ‘केपी शर्मा ओली आयोगमा बयान दिन जानुपर्छ ।’ आयोग अध्यक्ष गौरीबहादुर कार्की आफूप्रति पूर्वाग्रही भएको भन्दै आफू उनी नेतृत्वको आयोगमा बयान दिन नजाने अडान ओलीले लिइरहेका छन् ।

उपाध्यक्ष पोखरेलले अध्यक्षमा उम्मेदवारी दिने घोषणा गरे पनि प्यानलबारे छलफलमा रहेको बताएका छन् । उनले पार्टी र आन्दोलनको हितलाई केन्द्रमा राखेर आफूहरू अघि बढ्ने बताएका छन् । उनले भने, ‘प्रतिष्पर्धामा गरिन्छ भने त्यसको परिणामलाई स्वीकारिन्छ । जित्दा मात्रै खुशी होइन, जित्न नसक्दा पनि त्यसलाई स्वीर्कान सक्नु पर्छ । भीम रावल र माधव नेपालजीको जस्तो दृष्टान्त हाम्रो हकमा लागू हुँदैन । हामी प्रतिष्पर्धा गर्छौँ, यदि हामी विजयी नभए पनि एमालेको पक्षमा, एमाले भएर रहिरहन्छौं ।’ उनले वाम एकताको पक्षमा आफूहरू रहेको भन्दै पार्टी छाडेर जाने कुरा आफूहरूले नसोचेको बताएका छन् ।

वरिष्ठ उपाध्यक्ष पोखरेलले पूर्व राष्ट्रपति विद्या भण्डारीको सदस्यता रोक्नु गलत भएको बताएका छन् । उनले संविधान, विधान र अन्तर्राष्ट्रिय अभ्यासले पनि भण्डारीको सदस्यता रोक्न नमिल्ने भएकाले अवधारणामै ल्याएको बताए । उनले भने, ‘यो एजेण्डा यतिमाथिसम्म ल्याउनु पर्ने थिएन । तर अब आउने दिनका लागि पनि ओपन भयो ।’