नयाँ दिल्ली । भारतस्थित गोवाको बिर्च नाइटक्लबमा पाँच नेपालीसमेत २५ जनाको ज्यान जानेगरी आगलागी भएको पाँचौँ दिन बिहीबार क्लबका मालिक दाजुभाइ सौरभ लुथरा र गौरव लुथरालाई थाइल्यान्ड बाट पक्राउ गरिएको छ ।

स्थायी प्रहरीले हतकडी लगाएका र राहदानी बोकेका दाजुभाइको तस्बिर सार्वजनिक गरेको हो । स्रोतका अनुसार, भारतीय अधिकारीहरूको टोली थाइल्यान्ड गएको छ र लुथरा दाजुभाइलाई २४ घण्टाभित्र फिर्ता ल्याईने जनाएको छ । गोवा प्रहरीले भारत फिर्ता ल्याए लगतै उनीहरूलाई हिरासतमा लिने जनाएको छ ।

यही मंसिर २० गते अर्थात् डिसेम्बर ६ मध्यराति बिर्च नाइटक्लबमा आगलागी हुँदा २५ जनाको मृत्यु भएको थियो । तीमध्ये ५ जना नेपाली पनी परेका छन्। घटनापछि क्लबका मालिक लुथरा दाजुभाइ भारतबाट भागेर थाइल्यान्ड पुगेका थिए । उनीहरूविरुद्ध अपराधपूर्ण हत्या र लापरबाहीको आरोप लगाइएको छ । उक्त आगलागीमा परी दाङका ३१ वर्षीय चूर्णबहादुर पुन, सिन्धुलीका लीलबहादुर कटुवाल(विवेक), डडेलधुराका मनोज जोरा, झापाका सबिन विश्वकर्मा र सुदीप गुरुङको मृत्यु भएको थियो ।

उनीहरूको शव नेपाल ल्याउने तयारी भइरहेको सरकारले जनाएको छ ।