काठमाडौं । नेकपा एमालेका उपमहासचिव योगेश भट्टराईले पार्टीभित्रको उम्मेदवार विवादलाई पछि सार्दै सबैलाई एकतामा लाग्न आह्वान गरेका छन् । उनले आफू व्यक्तिगत रूपमा केही माग नगर्ने स्पष्ट पारेका छन्, तर केही निर्वाचन क्षेत्रमा उम्मेदवार मिलाउन अध्यक्ष केपी शर्मा ओलीसँग अनुरोध गरेका छन् ।

उपमहासचिव भट्टराईले काठमाडौंमा भने, ‘कमरेड अध्यक्ष, तपाईं यो पार्टीको सम्मानित नेता हुनुहुन्छ । हामी सबै तपाईंको नेतृत्वमा छौं । अहिले महाधिवेशन र निर्वाचनको समयमा पार्टीको सफलता नै हाम्रो पहिलो लक्ष्य हुनुपर्छ । यदि देशभरिका केही निर्वाचन क्षेत्रमा उम्मेदवार मिलाउन सकिन्छ भने त्यसमा मेरो ध्यानाकर्षण चाहन्छु ।’ उनी आफ्नै उम्मेदवारीको विषयमा स्पष्ट छन् ।

भट्टराईले भने, ‘म ताप्लेजुङबाट उम्मेदवार बन्न इच्छुक थिएँ । तर पार्टीले निर्णय गरेको छ र त्यसमा म अब कुनै किचलो गर्ने वाला छैन । जसलाई उम्मेदवार बनाइयो, सूर्य चिन्ह ध्वजावाहकलाई जिताउन मेरो कर्तव्य हो । यसमा म दृढताका साथ अघि बढ्छु ।’ भट्टराईले कतिपय निर्वाचन क्षेत्रमा साथीहरूमाथि न्याय नभएको जस्ता गुनासोहरू आएको पनि स्वीकारे । उनले भने, ‘मैले सचिवालयको बैठकपछि पनि दर्जनौँ ठाउँमा उम्मेदवार परिवर्तन भएको देखें । त्यसैले अब अन्तिम अवसरमा पनि म अध्यक्ष कमरेड केपी ओलीलाई अनुरोध गर्न चाहन्छु–सात, आठ, नौ, १० निर्वाचन क्षेत्रमा उपयुक्त मिलान गर्न सकिए राम्रो हुने देख्छु, ताकि पार्टी कमजोर नहोस् ।’

उनले भिडिओ सन्देशमार्फत पार्टीभित्रको फरक मत स्वाभाविक भएको तर त्यो पार्टीको जितमा बाधा पु¥याउन नहुने बताए । ‘हामीले उम्मेदवार छनोट गर्दा न्यायसंगत ढंग अपनायौं कि अपनाएनौं ? लोकप्रिय, पार्टी प्रति निष्ठावान उम्मेदवार दिएका छौं कि दिएका छैनौं ? यी सबै विषयको समीक्षा चुनावपछि गरौँला । अहिले हाम्रो लागि केही बाँकी छैन, अगाडि सूर्य चिन्ह मात्रै छ ।’ उपमहासचिव भट्टराईले आगामी निर्वाचन र पार्टीको नेतृत्व सशक्त बनाउन सबैलाई मिलेर काम गर्न अपील गरेका छन् । उनले जोड दिए, ‘हामीले उम्मेदवार विवादलाई पछि सार्दै सूर्य चिन्ह जिताउनमा केन्द्रित हुनुपर्छ । पार्टीको एकता नै हाम्रो सबभन्दा ठूलो शक्ति हो ।’