काठमाडौं। चार हजार करोड बजेटमा निर्माण भइरहेको बलिउड चलचित्र ‘रामायणम्’ यतिबेला चर्चाको केन्द्रमा रहेको छ। यसको भव्य सेट, ध्वनि, कलाकार र पारिश्रमिकबारे व्यापक चर्चा भइरहेको छ।

यस चलचित्रमा सीताको भूमिकामा दक्षिण भारतीय अभिनेत्री साई पल्लवी देखिने भएकी छन्। उनको पारिश्रमिक सार्वजनिक भएपछि ९० को दशकको चर्चित टेलिभिजन सिरियलसँग तुलना हुन थालेको छ।

‘रामायणम्’का दुई संस्करणका लागि साई पल्लवीले कुल १२ करोड रुपैयाँ पारिश्रमिक लिएको बताइएको छ। अर्थात् उनले एक संस्करणका लागि ६ करोड रुपैयाँ लिएकी हुन्।

यससँगै ९० को दशकमा रामानन्द सागर द्वारा निर्माण गरिएको रामायण सिरियलको सम्झना गरिएको छ। उक्त सिरियलमा सीताको भूमिका निर्वाह गरेकी दीपिका चिखलिया ले जम्मा २० लाख रुपैयाँ पारिश्रमिक लिएकी थिइन्।

त्यतिबेला उक्त सिरियलको कुल बजेट करिब ७ करोड रुपैयाँ थियो भने एउटा भाग निर्माण गर्न झन्डै ९ लाख रुपैयाँ खर्च हुने गरेको थियो।

समयसँगै चलचित्र उद्योगमा आएको परिवर्तन, प्रविधिको विकास र बजार विस्तारका कारण पारिश्रमिकमा ठूलो अन्तर देखिएको विश्लेषकहरू बताउँछन्।