काठमाडौं । पाँच दिनदेखि सुरुङभित्र फसेका त्रिशूली थ्री–‘ए’ जलविद्युत् आयोजनाका कर्मचारीको उद्धारमा महत्वपूर्ण सफलता हात परेको छ।

उद्धारमा खटिएको टोलीले मानिस प्रवेश गर्न सक्ने ‘केबल एक्सेस टनेल’ फेला पारेपछि उद्धारको सम्भावना बढेको हो।

नेपाली सेना, नेपाल विद्युत् प्राधिकरण र सुरुङ विज्ञसहितको टोलीले तीन दिनको निरन्तर प्रयासपछि विद्युत् गृहबाट केबल बाहिर निकाल्न बनाइएको सुरुङ पत्ता लगाएको हो।

प्राधिकरणका कामु प्रबन्ध निर्देशक दीर्घायुकुमार श्रेष्ठका अनुसार अब उद्धार विज्ञलाई उक्त सुरुङबाट भित्र पठाएर फसेका कर्मचारीको अवस्थाबारे जानकारी लिने तयारी छ। यसअघि सुरुङभित्र हावा पुर्‍याउन पाँचवटा ड्रिल गरिएका थिए।

सांसद तथा सुरुङविज्ञ श्रीराम न्यौपानेले पनि सुरुङ भेटिएको पुष्टि गरेका छन्। उनका अनुसार उद्धार टोलीले भित्रको अवस्था बुझ्ने काम गरिरहेको छ।

आयोजनाको भूमिगत विद्युत् गृहमा ओभरहलिङको काम गरिरहेका करिब ४०–४२ जना प्राविधिक सुरुङभित्र फसेको अनुमान छ। अक्सिजन पठाउने बाटो बनेकाले उनीहरू सकुशल रहेको आशा गरिएको छ।