काठमाडौं । उज्यालो नेपाल पार्टीका अध्यक्ष कुलमान घिसिङले जेनजी आन्दोलनले उठाएका सुशासन, भ्रष्टाचार अन्त्य र नागरिकमैत्री शासनका सवालमा वर्तमान सरकारले अपेक्षित परिणाम दिन नसकेको बताएका छन् ।

जेनजी आन्दोलनको एक वर्ष पूरा भएको अवसरमा वक्तव्य जारी गर्दै घिसिङले आन्दोलन सरकार परिवर्तनका लागि मात्र नभई राजनीतिक संस्कार र शासनशैली बदल्न उठेको पुस्ताको आवाज भएको बताएका हुन् ।

उनले आन्दोलनमा ज्यान गुमाउनेप्रति श्रद्धाञ्जली र घाइतेप्रति शीघ्र स्वास्थ्यलाभको कामना गर्दै आन्दोलनको मूल म्यान्डेट अझै पूरा हुन बाँकी रहेको बताए ।

उनका अनुसार आन्दोलनपछि गठन भएको सरकारले प्रतिनिधिसभाको निर्वाचन सम्पन्न गराएर राजनीतिक प्रक्रियालाई लोकतान्त्रिक बाटोमा फर्काए पनि सुशासनका क्षेत्रमा अपेक्षित गति लिन सकेको छैन ।

संविधान, शासन प्रणाली र राज्य संरचनालाई नागरिकमैत्री बनाउने, भ्रष्टाचारमा शून्य सहनशीलता अपनाउने तथा रोजगारी र उद्यमशीलता बढाउने विषयमा ठोस प्रगति आवश्यक रहेको उनले बताए ।

‘अब भाषण, घोषणा र राजनीतिक नाराले पुग्दैन,’ घिसिङले भने, ‘जनताले खोजेको परिवर्तन शासन गर्ने व्यक्तिको मात्र होइन, प्रणाली र कार्यशैलीको परिवर्तन हो।’

उज्यालो नेपाल पार्टीले सरकारका कामकारबाहीमा खबरदारी, निगरानी र रचनात्मक दबाबलाई निरन्तरता दिने जनाएको छ ।

घिसिङले जेनजी आन्दोलनको बलिदानलाई इतिहासको एउटा घटनामा सीमित नगरी त्यसले उठाएका मुद्दालाई राज्य सञ्चालनको मार्गदर्शन बनाउनुपर्नेमा जोड दिएका छन् ।