काठमाडौं । भोटेकोसी बाढीबाट रसुवा र नुवाकोटमा ठूलो जनधनको क्षति भइरहेका बेला सरकारी तथा सार्वजनिक सेवामा कार्यरत ५८ जना अझै बेपत्ता रहेको संघीय मामिला तथा सामान्य प्रशासन मन्त्रालयले जनाएको छ ।

मन्त्रालयका अनुसार बेपत्तामध्ये ८ जना स्थानीय तहका जनप्रतिनिधि छन् । स्वास्थ्यकर्मी, शिक्षक, भन्सार तथा अध्यागमन कर्मचारी, क्वारेन्टाइनका प्राविधिक र राष्ट्रिय निकुञ्जका कर्मचारीसमेत बाढीपछि सम्पर्कविहीन छन् ।

रसुवाको गोसाइँकुण्ड गाउँपालिकामा मात्रै जनप्रतिनिधि, कर्मचारी, स्वास्थ्यकर्मी र शिक्षकसहित ठूलो संख्या बेपत्ता छ । गाउँपालिका अध्यक्ष केसाङ नुर्पु तामाङका अनुसार उपाध्यक्ष प्रतिमा तामाङ, दुई वडाध्यक्ष तथा वडासदस्यसहित २४ जना अझै फेला परेका छैनन् ।

बेपत्ताको सूचीमा लेखा अधिकृत, आन्तरिक लेखा परीक्षक, कृषि प्राविधिक, स्वास्थ्यकर्मी, मनोसामाजिक परामर्शदाता, कार्यालय सहयोगी र शिक्षकसमेत छन् । तीन महिनाको बच्चासहित रहेकी अनमी र पाँच वर्षको छोरासहित कार्यालय सहयोगीसमेत बाढीपछि सम्पर्कविहीन छन् ।

उत्तरगया गाउँपालिकाबाट पनि कार्यपालिका सदस्य, सूचना प्रविधि तथा जनस्वास्थ्य अधिकृत, अनमी र कार्यालय सहयोगीसहित १५ जना बेपत्ता रहेको गाउँपालिका अध्यक्ष माधवप्रसाद अर्यालले बताएका छन् ।

रसुवाको टिमुरेस्थित भन्सार र अध्यागमन कार्यालयमा कार्यरत कर्मचारी पनि बाढीको चपेटामा परेका छन् । भन्सार कार्यालयका १५ जना कर्मचारी बेपत्ता रहेको मन्त्रालयले जनाएको छ । भन्सार अधिकृत नकुल शर्माको शव फेला परिसकेको छ भने अन्य कर्मचारीको खोजी जारी छ ।

रसुवागढी अध्यागमन कार्यालयका वरिष्ठ अध्यागमन अधिकृत दुर्गाप्रसाद पोखरेलसहित केही कर्मचारीको अवस्था अझै अज्ञात छ । अध्यागमन अधिकृत यादव भण्डारीको भने शव फेला परेको छ ।

टिमुरेस्थित प्लान्ट क्वारेन्टाइन कार्यालयका तीन कर्मचारी तथा लाङटाङ राष्ट्रिय निकुञ्जका रेन्जर र गेमस्काउटसहित तीन जना पनि बेपत्ता रहेको मन्त्रालयले जनाएको छ ।

बाढीले शिक्षक र विद्यार्थीसमेत प्रभावित भएका छन् । गोसाइँकुण्ड र उत्तरगयाका गरी कम्तीमा ८ शिक्षक बेपत्ता रहेको स्थानीय तहले जनाएको छ । उत्तरगया क्षेत्रमा दुई विद्यालयका २ सयभन्दा बढी विद्यार्थी पनि बाढीपछि सम्पर्कविहीन भएको अध्यक्ष अर्यालले बताएका छन् ।

यसैगरी, विद्यालय नर्स ममता श्रेष्ठ र एक निजी विद्यालयका प्रधानाध्यापक सुरज डंगोलको अवस्थासमेत अज्ञात रहेको जनाइएको छ ।

बाढीले सरकारी कार्यालयदेखि विद्यालयसम्मका जनशक्ति प्रभावित बनाएपछि उद्धारसँगै बेपत्ताको यकिन विवरण संकलन र खोजी कार्यलाई चुनौतीपूर्ण बनाएको छ ।