काठमाडौं। कानुन, न्याय तथा संसदीय मामिलामन्त्री सोविता गौतमले जेनजी आन्दोलनले उठाएका माग र देखाएका सपनालाई पूरा गर्न सरकार प्रतिबद्ध रहेको बताएकी छन्।

जेनजी आन्दोलनको एक वर्ष पुगेको अवसरमा बानेश्वरस्थित तत्कालीन संसद् भवन परिसरमा आयोजित कार्यक्रममा बोल्दै मन्त्री गौतमले आन्दोलनका क्रममा भएको पीडा आफूहरूले पनि महसुस गरेको बताइन्।

उनले २०८२ भदौ २३ र २४ गतेका घटनालाई एउटै दृष्टिले हेर्न नहुने धारणा राखिन्।

‘२३ गतेको जस्तो नियति कसैले भोग्न नपरोस्,’ उनले भनिन्, ‘तपाईंहरूले भोगेको पीडा हामीले पनि महसुस गरेका छौँ। हामी पनि चैनले निदाउन सकेका छैनौँ।’

मन्त्री गौतमले प्रतिनिधिसभामा राष्ट्रिय स्वतन्त्र पार्टी (रास्वपा)को उपस्थिति रहे पनि राष्ट्रियसभामा प्रतिनिधित्व नहुँदा कानुन निर्माणमा केही असहजता रहेको संकेत गरिन्। आन्दोलनपछि बनेको सरकार र त्यसका कामकारबाहीको मूल्यांकन जनताले आफैँ गरिरहेको उनको भनाइ थियो।

उनले आपसी विवाद र संघर्षले अन्ततः आन्दोलनका विरोधीलाई फाइदा पुग्ने चेतावनीसमेत दिइन्। सरकार स्पष्ट र सफा नियतका साथ अघि बढिरहेको दाबी गर्दै सही उद्देश्यका साथ काम गर्न सके मुलुकको विकासका लागि धेरै समय नलाग्ने बताइन्।

‘नियत सफा राख्यौँ भने देश बन्न धेरै समय लाग्दैन,’ उनले भनिन्, ‘सहिद र घाइतेले देखेका तथा तपाईंहरूले बोकेका हरेक सपना पूरा गर्न सरकार पूर्ण रूपमा प्रतिबद्ध छ।’

सरकारले आफ्ना कामलाई क्रमशः व्यवस्थित गर्दै अघि बढाइरहेको भन्दै उनले नागरिकलाई सरकारप्रति विश्वास कायम राख्न आग्रह गरिन्।