पोखरा। गत वर्ष भदौ २४ गतेको जेन–जी आन्दोलनमा क्षतिग्रस्त पोखराका सरकारी भवन र सरकारी आवास एक वर्ष बितिसक्दा पनि पुनर्निर्माण हुन सकेका छैनन्।

आन्दोलनका क्रममा क्षति पुगेका कतिपय संरचना अहिले पनि भग्नावशेषकै अवस्थामा छन् भने सरकारी सेवा भने वैकल्पिक स्थानबाट सञ्चालन भइरहेका छन्।

सिंहदरबार र संघीय कार्यालय रहेको काठमाडौं उपत्यकापछि भौतिक संरचनामा ठूलो क्षति व्यहोरेको सहरका रूपमा पोखरा देखिएको थियो।

आन्दोलनका क्रममा गण्डकी प्रदेश सभा भवन, प्रदेश प्रशिक्षण प्रतिष्ठान, मुख्यमन्त्री तथा मन्त्रिपरिषद्को कार्यालय, विभिन्न मन्त्रालय, प्रदेश प्रमुखको कार्यालय तथा आवास र मन्त्री आवासमा आगजनी भएको थियो।

पोखरा महानगरपालिकाको मुख्य भवन तथा वडा कार्यालय, जिल्ला प्रशासन कार्यालय, मालपोत, नापी र शिक्षा कार्यालयसहित कास्कीमा रहेका संघीय सरकारका दर्जनौँ कार्यालयसमेत आन्दोलनकारीको निशानामा परेका थिए।

मुख्यमन्त्री तथा मन्त्रिपरिषद्को कार्यालय र मन्त्रालयका भवनमा सामान्य मर्मत तथा सरसफाइ गरेर सेवा सञ्चालनमा ल्याइएको छ। तर मन्त्री आवासको पुनर्निर्माण अझै पूरा भएको छैन।

प्रदेश सभा भवनमा भएको क्षति गम्भीर रहेकाले त्यसलाई तत्काल प्रयोग गर्न सकिने अवस्था छैन। नयाँ भवन निर्माणको काम अघि बढेकाले प्रदेश सभा वैकल्पिक स्थानबाट सञ्चालन भइरहेको छ।

पोखरा महानगरपालिकाले पनि नयाँबजारस्थित राष्ट्रिय वाणिज्य बैंकको भवन भाडामा लिएर कार्यालय सञ्चालन गरिरहेको छ। भवन पुनर्निर्माण नहुँदासम्म महानगरको प्रशासनिक काम त्यहीँबाट हुँदै आएको छ।

आन्दोलनका क्रममा मन्त्री तथा सांसदका निजी घर र व्यावसायिक संरचनामा समेत आगजनी भएको थियो। निजी क्षेत्रका अधिकांश घर तथा होटल पुनर्निर्माणपछि पुरानै अवस्थामा फर्किए पनि केही संरचना अझै निर्माणाधीन छन्।

तस्बिरमा हेर्नुहोस्, जेन-जी आन्दोलनमा क्षतिग्रस्त पोखराका सरकारी भवनको एक वर्षपछिको अवस्था।

तस्बिर : नेपाल फोटो लाइब्रेरी