काठमाडौं। राष्ट्रपति रामचन्द्र पौडेलले भोटेकोसी बाढीप्रभावितहरूको तत्काल व्यवस्थापन, क्षतिग्रस्त सडक सञ्चालन तथा पुनर्निर्माण र पुनर्स्थापनाका कामलाई तीव्रता दिन सरकारको ध्यानाकर्षण गराएका छन्।

शीतल निवासमा भदौ २४ गते बुधबार परराष्ट्रमन्त्री शिशिर खनाल, पूर्वाधार विकासमन्त्री सुनिल लम्साल, सांसद अर्जुननरसिंह केसी र प्रधानसेनापति अशोकराज सिग्देलसँगको छुट्टाछुट्टै छलफलका क्रममा राष्ट्रपति पौडेलले उद्धार, राहत र पुनर्स्थापनालाई प्राथमिकता दिन आग्रह गरेका हुन्।

राष्ट्रपति पौडेलले बाढीपीडितका लागि होल्डिङ सेन्टरको व्यवस्थापन र सडक पहुँच पुनःस्थापनाको काम छिटो सक्न निर्देशन दिएका छन्। साथै, विकट भौगोलिक अवस्थालाई ध्यानमा राख्दै ठूला बेलिब्रिज निर्माणका लागि आवश्यक परे अन्तर्राष्ट्रिय समुदायको सहयोग लिन र जलवायु परिवर्तनका कारण नेपालले व्यहोरेको क्षतिको क्षतिपूर्ति पाउन प्रधानमन्त्रीले अन्तर्राष्ट्रिय मञ्चमा सशक्त आवाज उठाउनुपर्ने सुझाव उनले दिए।

भेटमा मन्त्रीद्वय खनाल र लम्सालले दसैँअघि नै सडक यातायात सुचारु गर्ने र प्रभावितका लागि अस्थायी आवास निर्माण सम्पन्न गर्ने गरी काम भइरहेको जानकारी गराएका थिए। बाढीग्रस्त क्षेत्रमा वैकल्पिक सडक निर्माण र अन्य योजनाहरू अघि बढाइएको उनीहरूको भनाइ थियो।

बाढीप्रभावित क्षेत्रको स्थलगत निरीक्षणपछि राष्ट्रपति पौडेलले अल्पकालीन, मध्यकालीन र दीर्घकालीन योजना बनाएर पुनर्निर्माणमा लाग्न र नागरिकको जनजीवन सामान्य बनाउने कामलाई प्राथमिकता दिन आग्रह गरेका छन्।