काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले संविधान दिवसको अवसरमा स्वदेश तथा विदेशमा रहेका सम्पूर्ण नेपाली नागरिकलाई शुभकामना व्यक्त गरेका छन्।

संविधान दिवसका अवसरमा सन्देश जारी गर्दै लामिछानेले संघीय लोकतान्त्रिक गणतन्त्र स्थापना र संविधान निर्माणका लागि जीवन उत्सर्ग गर्ने सम्पूर्ण ज्ञात-अज्ञात शहीदप्रति उच्च सम्मानसहित श्रद्धाञ्जली अर्पण गरेका छन्।

उनले कुनै पनि देशको संविधान अक्षरहरूको सँगालो मात्र नभई राज्य र नागरिकबीचको पवित्र करार भएको बताएका छन्। नेपालको सन्दर्भमा भने आर्थिक समृद्धि, सामाजिक न्याय र सुशासनको बलियो आधार निर्माण गर्ने अभिभारा अझै पूरा हुन नसकेको उनको भनाइ छ।

लामिछानेले लोकतन्त्रको स्थायित्व र संविधानको सार्थकता त्यसबेला मात्र सिद्ध हुने बताएका छन्, जब संविधानले परिकल्पना गरेका मौलिक हकहरू सीमान्तकृत नागरिकको दैनिक जीवनको यथार्थ बन्न सक्नेछन्।

‘राष्ट्रिय स्वतन्त्र पार्टीले सामाजिक लोकतन्त्रमार्फत नै नागरिकको मुहारमा खुसी र समाजमा न्याय स्थापित गर्ने अठोट गरेको छ,’ उनले भनेका छन्।

संविधान जीवन्त दस्तावेज भएकाले राजनीतिक अभ्यासबाट प्राप्त अनुभवका आधारमा यसको अन्तर्वस्तु परिष्कृत तथा संशोधन हुन सक्ने लामिछानेले बताएका छन्। संविधानमै व्यवस्था गरिएको प्रावधानले पनि संविधानको समीक्षा आवश्यक रहेको उनको भनाइ छ।

‘तर, अबको समीक्षा पिँधमा रहेका मान्छेलाई केन्द्रमा राखेर हुनुपर्छ,’ उनले भनेका छन्।

लामिछानेले बेथिति र कमजोरीलाई सच्याउँदै लोकतन्त्र र समावेशितालाई थप बलियो बनाउने गरी विवेकपूर्ण बहस गर्ने उपयुक्त दिन संविधान दिवस भएको बताएका छन्।

‘बलियो राज्य भनेको बलिया संस्था हुन्,’ उनले भनेका छन्, ‘संविधान दिवसले हामी सबै राजनीतिक शक्ति, राज्यका अङ्गहरू र आम नागरिकलाई आ–आफ्नो स्वार्थभन्दा माथि उठेर बलियो नेपाल निर्माणको साझा एजेन्डामा एकताबद्ध हुन प्रेरणा प्रदान गरोस्।’

सन्देशको अन्त्यमा उनले ‘सबैको जय होस्’ भन्दै ‘जय देश, जय घण्टी’ उल्लेख गरेका छन्।