काठमाडौं । नेपाली कांग्रेसकी सांसद निनुकुमारी कर्णले अविरल वर्षापछि देशका विभिन्न ठाउँमा सडक सञ्जाल विच्छेद हुँदा अत्यावश्यक वस्तुको आपूर्ति प्रभावित भएको भन्दै सरकारको ध्यानाकर्षण गराएकी छन्।

प्रतिनिधिसभाको मंगलबारको बैठकमा शून्य समयमा बोल्दै कर्णले बाढी र पहिरोका कारण सडक ठाउँठाउँमा भत्किएकाले तत्कालै मर्मत गरेर नियमित सञ्चालन गर्न सकिने अवस्था नरहेको बताइन्।

उनका अनुसार सडक अवरुद्ध भएपछि बजारमा महँगी बढ्नुका साथै नागरिकले दैनिक उपभोग्य वस्तुसमेत सहज रूपमा पाउन सकेका छैनन्।

‘निरन्तरको वर्षाले सडक सञ्जाल विच्छेद भएका छन्। त्यसको असर बजारमा परेको छ र दैनिक उपभोग्य वस्तुको आपूर्तिसमेत प्रभावित भएको छ,’ उनले भनिन्।

सडक सञ्जाल तत्काल खुलाउन नसकिने अवस्थामा सरकारले वैकल्पिक माध्यमबाट अत्यावश्यक वस्तुको आपूर्ति सुनिश्चित गर्नुपर्ने उनको भनाइ छ।

‘सडक सञ्जाल बन्द भएको अवस्थामा नागरिकलाई सहज रूपमा आवश्यक वस्तु उपलब्ध गराउने सरकारको ठोस योजना के छ ? म यसको स्पष्ट जवाफ चाहन्छु,’ कर्णले प्रश्न गरिन्।

सडक अवरुद्ध हुँदा नागरिकको जनजीवन थप कष्टकर बन्नुका साथै कालोबजारीको जोखिमसमेत बढ्न सक्ने भन्दै उनले तत्काल राहत र आपूर्तिको व्यवस्था मिलाउन तथा दीर्घकालीन रूपमा सडक पूर्वाधारलाई विपद् प्रतिरोधी बनाउन सरकारको ध्यानाकर्षण गराइन्। प्रतिनिधिसभामा बाढी प्रभावित क्षेत्रमा सडक सञ्जाल पुनःस्थापना र अत्यावश्यक सामग्रीको आपूर्तिलाई प्राथमिकता दिनुपर्ने विषय अन्य सांसदहरूले पनि उठाएका छन्।