काठमाडौँ, २६ असार : संस्कृति, पर्यटन तथा नागरिक उड्डयनमन्त्री हितबहादुर तामाङले नेपालको प्राचीन तथा ऐतिहासिक मुद्राको सम्बन्ध पुरातात्विक सम्पदा र राष्ट्रियतासँग जोडिने बताउनुभएको छ ।

नेपालको प्राचीन तथा ऐतिहासिक मुद्रा सङ्कलन गरी विश्व कीर्तिमान् राख्नुभएका दीपेन्द्र रत्न शाक्यको एक सय ९३ मुलुकको सिक्का प्रदर्शनीको आज उद्घाटन गर्दै मन्त्री तामाङले देश विदेशमा छापेका मुद्रा सङ्कलन कार्य उत्कृष्ट भएको बताउनुभयो । प्राचीन मुद्राको बहुआयामीक महत्व रहेकोसमेत् उहाँको भनाइ छ । यस्ता कार्यले विदेशीमाझ नेपालको पर्यटकीय गन्तव्य प्रवर्द्धन गर्न मद्दत पुगेको विश्वास व्यक्त गर्नुभयो ।

बाल सङ्कलक लक्ष्यजीत मल्लद्वारा सङ्कलित मुद्रा नेपाल मुद्रा सङ्कलक सङ्घले पर्यटन मन्त्रालयसँगको सहकार्यमा प्रदर्शनी गरेको हो । पर्यटनमन्त्री तामाङले बुद्धकालीन, लिच्छविकाल, राजतन्त्रदेखि गणतन्त्रसम्मको मुद्रा सङ्कलन गरी प्रदर्शनी गर्न सफल बाल सङ्कलकद्वयको प्रशंसा गर्नुभयो ।