काठमाडौं ।  नेपाली कांग्रेसका सभापति शेरबहादुर देउवाले जलवायु परिवर्तनका असरबाट नेपाल विश्वको तुलनामा सबैभन्दा बढी प्रभावितमध्येको मुलुक भएको बताएका छन् ।

बुधबार साथसाथै संस्थाको कोइला ऊर्जाको प्रयोग बन्द गर्नुपर्ने अभियानसम्बन्धी ज्ञापनपत्र बुझ्दै सभापति देउवाले नेपालले नगन्य मात्रामा कार्बन उत्सर्जन गरे पनि जलवायुका कारण प्राकृतिक विपद्का घटना व्यहोर्नुपरेको बताएका हुन् । यसको क्षतिपूर्तिका लागि विश्वव्यापी पहल आवश्यक रहेको उनले बताए ।

सभापति देउवाले विश्वव्यापी तापमान वृद्धिका कारण नेपालका हिमाल पग्लिने क्रम बढेको, अस्वाभाविक मौसमले जनजीवनमा ठूलो प्रभाव परेको बताउँदै यसबारे विश्वको ध्यानाकर्षण गर्नुपर्ने आवश्यकता रहेको बताए ।

सभापति देउवाले आफूले संयुक्त अधिराज्यको ग्लास्गोमा सन् २०२१ मा भएको कोप–२६ सम्मेलनमा नेपालका तर्फबाट सन् २०४५ सम्म कार्बन उत्सर्जन शून्यमा पुर्‍याउने प्रतिबद्धता व्यक्त गरेको स्मरण गर्दै अब नेपालले विद्युतीय ऊर्जाको प्रयोग बढाउँदै जानुपर्ने बताए ।