दाङ । नेकपा एमालेकी नेतृ शान्ता चौधरीको सुर्खेत वीरेन्द्रनगरस्थित अचार पसलमा आगजनी गरेको अभियोगमा प्रहरीले एक जनालाई पक्राउ गरेको छ । चौधरीको वीरेन्द्रनगर–६ सुपरमार्केटस्थित अचार पसलमा कार्तिक ३० गते बिहान करिब साढे ४ बजे आगजनी भएको थियो । पहिले शान्ताको पलससँगै रहेको बेबीशपमा लागेको आगो पछि शान्ताको पसलमा सल्किएको खुलेको छ । प्रहरी अनुसन्धानबाट बेबी शप सञ्चालकका देवरले पसलमा आगो लगाएको खुलेको छ ।

पसलमा आगो लगाएको आरोपी दीपक कँडेललाई प्रहरीले पक्राउ गरिसकेको छ । सुर्खेत प्रहरीका प्रवक्ता डिएसपी मोहोन बुढाका अनुसार बेबी शप सञ्चालक र पक्राउ परेका कँडेलबीच अंशबन्डाको विवाद थियो । सोही विवादका कारण दीपकले भाउजुको पसलमा आगो लगाएको बयान दिएका छन् । अर्काको पसलबाट सल्किएको आगोले शान्ताको अचार पसलमा ३० लाख रुपैयाँभन्दा बढीको क्षति भएको प्रहरीले जनाएको छ ।