काठमाडौं । राष्ट्रिय स्वतन्त्र पार्टी (रास्वपा)को सचिवालय बैठकले विवेकशील साझाबाट एकता प्रक्रियामा आएका नेताहरूलाई केन्द्रीय समितिमा मनोनयन गरेको छ ।

सभापति रवि लामिछाने रिहा भएपछि बसेको पहिलो सचिवालय बैठकले कुलमान घिसिङ नेतृत्वको तत्कालीन उज्यालो नेपाल पार्टी र काठमाडौं महानगरपालिकाका प्रमुख बालेन्द्र शाह ‘बालेन’ टिमलाई छुटाएर केन्द्रीय समिति सदस्यहरू मनोनयन गर्ने निर्णय गरेकाे हो ।

मनोनीत केन्द्रीय सदस्यहरू समीक्षा बास्कोटा, प्रकाशचन्द्र परियार, सुरज प्रधान, नवराज थापा, आशुतोष प्रधान, धनेज थापा र रञ्‍जु दर्शना हुन् ।

पार्टीको बृहत्तर एकता सभाको अघिल्लो दिन भएको यस्तो निर्णयले रास्वपाभित्र चुलिँदो मतभेदलाई उजागर गर्छ ।

रास्वपामा खासगरी सभापति लामिछाने र वरिष्ठ उपसभापति कुलमान घिसिङबीच मतभेद छ । मतभेदबीच घिसिङ पक्ष हालै निर्वाचन आयोगमा पुगेको थियो ।

यस्तोमा बसेको रास्वपाको सचिवालय बैठकले विवेकशीलबाट आएकाहरूलाई मात्रै केन्द्रीय सदस्यमा मनोनीत गरेको हो ।

यद्यपि, बैठकमा पार्टी समायोजन र निर्वाचन प्रक्रियाबारे छलफल भइरहेको छ ।