काठमाडौं । काठमाडौं उपत्यकाभित्रका मुख्य तीन मालपोत कार्यालयका प्रमुखहरूलाई सरकारले जिम्मेवारीबाट हटाएको छ । सेवाग्राहीको अत्यधिक चाप हुने ललितपुर, भक्तपुर र काठमाडौंको चाबहिल मालपोत कार्यालयका प्रमुखहरूलाई एकसाथ सामान्य प्रशासन मन्त्रालयमा तानिएको हो ।

भूमि, सहकारी तथा गरिबी निवारणमन्त्री प्रा.डा. कुमार इङनामले केही दिनअघि ती कार्यालयहरूमा गरेको छड्के अनुगमनपछि यो ‘एक्सन’ लिइएको बुझिएको छ । मन्त्रालय स्रोतका अनुसार, अनुगमनका क्रममा कार्यालय प्रमुखहरूले बिचौलियासँग साँठगाँठ गरी सेवा प्रवाहमा ढिलासुस्ती गरेको र अनियमिततालाई प्रश्रय दिएको पाइएपछि उनीहरूको सरुवा गरिएको हो ।

जिम्मेवारी खोसिएर मन्त्रालय तानिनेहरूमा ललितपुर मालपोतका प्रमुख अशोककुमार भट्टराई, भक्तपुरका माधव घिमिरे र चाबहिल मालपोतका दीपेन्द्र खत्री रहेका छन् । उनीहरू केपी शर्मा ओली नेतृत्वको अघिल्लो सरकारका मन्त्री बलराम अधिकारीको कार्यकालमा ती कार्यालयमा नियुक्त भएका थिए । मालपोत कार्यालयहरूमा बिचौलियाको बिगबिगी रहेको र त्यसमा कर्मचारी संयन्त्रकै मिलेमतो हुने गरेको जनगुनासो लामो समयदेखि आउने गरेको थियो ।