गोरखा । पूर्व प्रधानमन्त्री डा. बाबुराम भट्टराईले व्यक्तिगत महत्वाकांक्षा भन्दा माथि राष्ट्रिय स्वाधीनता र भू–राजनीतिक सन्तुलनको आवश्यकता हेरेर गोरखा क्षेत्र नं २ बाट प्रतिनिधिसभा निर्वाचनमा उम्मेदवारी दिने घोषणा गरेका छन् ।गोरखा सदरमुकाममा आयोजित पत्रकार भेटघाटमा डा। भट्टराईले प्रारम्भमा चुनाव नलड्ने निर्णयमा रहे पनि पछिल्लो राजनीतिक परिस्थिति र स्थानीय जनताको आग्रहले उनलाई यो निर्णय फेरबदल गर्न बाध्य पारेको बताए । उनले भने, ‘प्रतिनिधिसभा राज्यको जनप्रतिनिधिको सर्वोच्च थलो हो । त्यहाँबाट मात्र राष्ट्रिय स्वाधीनता, सर्वभौमसत्ता र सुरक्षा नीतिका महत्वपूर्ण निर्णय प्रभावकारी रूपमा अगाडि बढाउन सकिन्छ ।’

प्रतिनिधिसभामा सक्रिय भूमिकाको महत्व
डा। भट्टराईले संसद बाहिर रहँदा राष्ट्रहितका एजेण्डा प्रभावकारी रूपमा अघि बढाउन गाह्रो हुने भएकाले संसद्भित्र सक्रिय भूमिका निर्वाह गर्नुपर्ने आवश्यकता रहेको बताए । लामो छलफलपछि उनले प्रगतिशील लोकतान्त्रिक पार्टी ९प्रलोपा० मार्फत गोरखा २ बाट उम्मेदवारी दिने निर्णय गरेका हुन् । उनी चुनावमा आफैंलाई संरक्षकको भूमिकामा मात्र सीमित नराखी, तर नयाँ पुस्तालाई अगाडि बढाउने सोच राख्दै आएका छन् । तर देशको राजनीतिक अवस्था अझै अस्थिर र भू–राजनीतिक परिस्थिति जटिल भएकाले उनले आफ्नो सहभागिता आवश्यक रहेको अनुभव गरेका छन् । ‘नयाँ शक्तिहरू उदय भए पनि पुरानो र नयाँ बीचको द्वन्द्वले राजनीतिक दिशालाई अस्पष्ट बनाइरहेको छ । यस्तो अवस्थामा अभिभावकीय भूमिका निभाउनु मेरो जिम्मेवारी हो’, डा। भट्टराईले भने ।

विदेशी शक्तिको प्रभाव र राष्ट्रिय सुरक्षा
डा। भट्टराईले चिनियाँ, भारतीय र पश्चिमी शक्तिहरूको स्वार्थले नेपालको स्वाधीनता र सार्वभौमसत्तामा प्रतिकूल असर पर्न सक्ने संकेत देखिएको बताए । यसैले उनी प्रधानमन्त्री भइसकेको व्यक्तिको भूमिकामा संक्रिय रूपमा उपस्थित हुनुपर्ने आवश्यकतामा विश्वास राख्छन् ।

चुनावी चुनौती र गोरखाको राजनीतिक विरासत
डा। भट्टराईले अघिल्ला निर्वाचनमा गोरखा क्षेत्रबाट लगातार सफलता हासिल गरेका छन् । उनी २०६४ सालको संविधानसभा निर्वाचनमा गोरखा–२ बाट सर्वाधिक मतसहित विजयी भए । २०७० मा गोरखा १ बाट निर्वाचित बने र २०७४ मा गोरखा–२ बाट फेरि जीत हासिल गरे । तर २०७९ को निर्वाचनमा उनले आफ्नो क्षेत्र प्रचण्डलाई हस्तान्तरण गरेका थिए ।

यसपालिको चुनाव चुनौतीपूर्ण देखिन्छ । उनका प्रमुख प्रतिस्पर्धीहरूमा सशस्त्र द्वन्द्वकालका सहकर्मी लेखनाथ न्यौपाने ९नेकपा०, गुण्डा नाइके मिलन चक्रे ९नेकपा एमाले० र सम्भावित राष्ट्रिय स्वतन्त्र पार्टीका उम्मेदवार कविन्द्र बुर्लाकोटी रहेका छन् । साथै, केही पुराना सहयोगी कार्यकर्ताहरू रास्वपा प्रवेश गरिसकेका छन् । हाल गोरखा २ मा कुल मतदाता १ लाख ८ हजार ५३३ छन् । अघिल्लो निर्वाचनमा करिब ४६ हजार मत ल्याएर जित हासिल गरेका भट्टराईका लागि यसपटक सहज विजयको सम्भावना न्यून देखिन्छ ।

युवा मतदाताले नयाँ अनुहारलाई प्राथमिकता दिँदै पुराना दलप्रतिको वितृष्णा बढाइरहेका कारण मत बाझिने सम्भावना छ । यद्यपि, आफ्नो योगदान र गोरखाको विकासमा पुर्याएको कामलाई सम्झेर डा। भट्टराई अझै गोरखाली जनताको समर्थन पाउने आशामा छन् । ‘सत्तामुखी होइन, सेवामुखी राजनीति गर्ने मेरो परम्परा नै गोरखाली जनताको मन जित्ने आधार हो। फेरि एक पटक उनीहरूको माया पाउने आशा छ’, उनले बताए ।