लोकप्रिय गायक तथा सर्जक नरेश खातीको नयाँ गीत ‘कान्छी’ भर्खरै सार्वजनिक भएको छ। नेपाली सांगीतिक क्षेत्रमा निरन्तर सक्रिय रहँदै आएका खातीको यस गीतले पनि दर्शक–श्रोताको ध्यान तान्ने अपेक्षा गरिएको छ।

नेपाली संगीत क्षेत्रमा आफ्नो छुट्टै पहिचान बनाउन सफल खातीले विगत एक दशकभन्दा लामो समयदेखि निरन्तर रूपमा नयाँ गीतहरू सार्वजनिक गर्दै आएका छन्। शब्द र लय सिर्जनामा अब्बल मानिने खातीको पछिल्लो गीतमा पनि उनी आफ्नै शैलीमा प्रस्तुत भएका छन्।

‘कान्छी’ गीतको विषयवस्तु माया र प्रेममा आधारित छ। गीतमा सरल तर भावनात्मक शब्द प्रयोग गरिएको छ, जसले प्रेमको अनुभूति व्यक्त गर्छ। गीतको शब्द र लय नरेश खाती स्वयंले सिर्जना गरेका हुन्।

गीतमा नरेश खातीलाई स्वरमा लोकप्रिय गायिका मेलिना राईले साथ दिएकी छन्। दुवैको आवाजको संयोजनले गीतलाई थप प्रभावशाली बनाएको छ।यस गीतको म्युजिक भिडियो पनि आकर्षक रूपमा तयार पारिएको छ। युवा निर्देशक विक्रम चौहानको निर्देशनमा बनेको भिडियोमा कलाकार मनोज गुरुङ र चुनावी विश्वकर्माको अभिनय देख्न सकिन्छ। भिडियोले गीतको भावलाई जीवन्त रूपमा प्रस्तुत गरेको छ।