काठमाडौं । झापा क्षेत्र नम्बर– ३ मा एमाले र राप्रपाबीचको तालमेल नभएपछि यतिबेला दुवै दल एक्लाएक्लै चुुनावी अभियानमा लागेका छन् । सो क्षेत्रमा एमाले नेता कार्यकर्ताको भावनाविपरीत केन्द्रबाट तालमेल हुँदै आएको थियो ।

१२ वर्षपछि झापा–३ मा एमालेले आफ्नै उम्मेदवार पाएको छ । पार्टीमा अनुशासित र शालिन नेताको पहिचान बनाएका हरिबहादुर राजवंशीले उम्मेदवारी दर्तापछि शुभचिन्तकहरूसँगको भेटघाटलाई तीब्र बनाएका छन् ।

‘भूमिपुत्र’ नै उम्मेदवार पाएपछि झापा–३ का मतदाता उत्साहित भएको एमाले कार्यकर्ताको धारणा छ ।

फागुन २१ मा हुने निर्वाचनको पूर्वसन्ध्यामा उम्मेदवारहरूले आन्तरिक भेटघाटलाई तीब्रता दिइरहेका छन् । यसैबीच मतदाताहरूले देखाएको सदभावले राजवंशी निर्वाचनमा जित निकाल्ने ठाउँमा पुगेका छन् ।

एमालेबाट उम्मेदवार बनेका राजवंशीले झापा–३ का मतदाता मत बदल्न आतुर रहेको बताउँछन् । सूर्यमा मतदान गर्न इच्छुक मतदाताहरूको भावना १२ वर्षपछि सम्बोधन भएको उनको भनाई छ । ‘१२ वर्षमा खोला फर्किन्छ भन्थे, ठ्याक्कै त्यस्तै भएको छ,’ उनले राजवंशी भन्छन्, ‘परिणामले पनि खोला फर्किएको प्रमाणित गर्नेछ ।’

चुनावी अभियानमा सक्रिय राजवंशी आम मतदाता आफ्नो उम्मेदवारीले खुशी भएको बताउँछन् । झापा– ३ मा अघिल्लो पटकसम्म सूर्यमा मत खसाल्न पाएनौं भन्ने मतदाताहरूको लागि अवसर प्राप्त भएको छ । सो क्षेत्रमा एमालेले उम्मेदवार नपाए पार्टीमा ठूलो विद्रोहको तयारी भएको थियो ।

एमाले बाह्रदशीका अध्यक्ष अनिल सापकोटाले आफ्नो पार्टी संगठन निर्माण गरेर अन्य पार्टीको उम्मेदवारलाई मत दिनु व्यावहारिक नभएको स्पष्ट पार्छन् ।

‘एमालेले बलियो संगठन बनाएपछि अरु पार्टीको उम्मेदवारलाई सहयोग गर्न आवश्यक नै छैन,’ उनी भन्छन्, ‘झापा–३ बाहिरबाट हेरेजस्तो मात्र छैन । यो क्षेत्रमा एमालेको बलियो र सुदृढ संगठन रहेको छ । हामी हाम्रो उम्मेदवारलाई विजय गराउने छौं ।’

अध्यक्ष सापकोटाका अनुसार झापा–३ को मुख्य प्रतिष्पर्धी भने राप्रपा नै हो ।

विकास ल्याउन जिताएर पठाएको मान्छे (राजेन्द्र लिङ्देन)ले ‘राजा’ ल्याऔं भनेपछि एमाले समर्थक मतदाता रुष्ट बन्दै आएका थिए ।

एमालेले भोट दिएपछि फर्केर नहेर्ने प्रवृत्तिले आफ्नो उम्मेदवार तयार गरेको एमाले नेताहरूको भनाई छ । एक नेता सोध्छन्, ‘एमालेले जिताएर पठाएको मान्छेले बाँकी समय कुनै समन्वय र सहयोग गर्नुपर्छ कि पर्दैन ?’

चुनाव जितेर जनताकै घर आँगनमा रहने राजवंशीको प्रतिवद्धता छ । उनले चुनाव जितेपछि क्षेत्रभन्दा बाहिर नबस्ने बताउँदै आएका छन् ।

आफ्नो प्रतिनिधिलाई भेट्न क्षेत्रका जनताले कुनै कष्ट गर्नुपर्दैन,’ उनले भने, ‘यो पटक राप्रपासँग तालमेल छैन । झापा– ३ को विकासका लागि मतदाताले एमालेको उम्मेदवार चाहेका थिए । अब ढुक्क भएर सूर्यमा मत दिनुहोस् ।’

एमालेको राष्ट्रवादी छविमाथि आम मतदातासमेत खुलेर प्रशंसा गरिरहेको बताउँदै राजवंशीले झापा–३ मा एमालेको विजयी सुनिश्चित भएको बताएका छन् ।

यसअघि सो क्षेत्रमा एमालेले राप्रपाका अध्यक्षसमेत रहेका राजेन्द्र लिङ्देनलाई सघाएको थियो । लिङ्देनले ४० हजार ६४८ मत ल्याएका थिए ।

उनका निकटम प्रतिद्वन्द्वी कांग्रेस नेता कृष्णप्रसाद सिटौलाले ३७ हजार ३७२ मत ल्याएका थिए । सिटौलालाई तत्कालीन सत्ता गठबन्धन (नेकपा माओवादी केन्द्र र नेकपा एकीकृत समाजवादी) दलहरूको साथ थियो ।

२०७४ सालको निर्वाचनमा पनि लिङ्देनले एमाले र माओवादीको साथ पाएरै सिटौलालाई हराएका थिए । लिङ्देनले ४४ हजार ६१४ मतसहित निर्वाचित हुँदा सिटौलाको पक्षमा ३१ हजार १७१ मत परेको थियो । २०७० सालमा कांग्रेस नेता सिटौलाले लिङ्देनलाई हराएका थिए ।

पञ्चायत कालमा गोलधाप गाविसका वडाध्यक्ष बनेका लिङ्देन २०६१ देखि ०६३ सम्म झापाको जिल्ला विकास समिति सभापति बनेका थिए । पटक–पटक झापा– ३ मा लिङ्देन निर्वाचित भएपछि राप्रपाले पकड क्षेत्रको रूपमा लिँदै आएको छ ।

झापा–३ मा यसअघिको निर्वाचनमा एमालेले समानुपातिकमा १९ हजार ४६० र राप्रपाले १९ हजार ७४३ मत प्राप्त गरेको थियो ।

यसपटक भने एमालेले आफ्नै उम्मेदवार उठाएपछि झापा–३ मा मुख्य प्रतिस्पर्धा गणतन्त्र पक्षधर एमाले र राजतन्त्र पक्षधर राप्रपाबीच हुने देखिएको छ ।

मतदाताले कसलाई विश्वास गर्ने हुन् भन्ने फैसला अब फागुन २१ गते हुने मतदानले गर्नेछ ।