काठमाडौं । राष्ट्रिय स्वतन्त्र पार्टी (रास्वपा)बाट चितवन–३ मा प्रतिनिधिसभा सदस्य उम्मेदवार बनेकी पूर्वसांसद सोविता गौतमले आफ्नो मुद्दा आफैं समाधान गर्न मूलधारको राजनीतिमा आएको बताएकी छिन् ।

उनले यो भएन, त्यो भएन भनेर विगतमा सांसदका रूपमा सरकारलाई गुनासो गरेको तर नसुनेको भन्दै आफैं राष्ट्रिय राजनीतिमा अघि बढेको बताइन् ।

उनले आफू एक्लै राम्रो भएर समाज राम्रो नबन्ने निष्कर्षका आधारमा देशमा सही नेतृत्वको खडेरी टार्न आफ्नो राजनीतिमा उपस्थिति भएको दाबी गरिन् ।

‘म एक्लै राम्रो भएर समाज कहाँ राम्रो बन्दो रहेछ त ? समाज कसले बनाइदिन्छ त ? भन्ने ठानेर यो देशमा राम्रो नेतृत्व गर्ने व्यक्तिहरूको खडेरी लागेको देखेर अब अरुलाई गुनासो गर्ने होइन, यो भएन, त्यो भएन भनेर कति उभिरहने ?’, उनले भनिन्, ‘सांसदहरूले मान्छे बेच्नेलाई कारबाही गर्नुपर्छ भनेर संसद् भवनमा आन्दोलन गर्दा त सरकाले सुनेन, आम नागरिकका कुरा कसरी सुन्छ ? त्यही भएर मूलधारको राजनीतिमा आउने र आफ्ना मुद्दा आफैं लागेर आफैँ समाधान गर्ने भनेर म राष्ट्रिय राजनीतिमा आएँ ।’

उनले २०८४ को चुनाव युवापुस्ताको विद्रोहले २०८२ मै गर्नुपरेको दाबी गरिने । उनको चितवन–३ मा नेपाली कम्युनिस्ट पार्टी (नेकपा) कि उम्मेदवार रेणु दाहालसँग प्रतिस्पर्धा हुँदैछ । कांग्रेसबाट टेकबहादुर गुरुङ पनि प्रतिस्पर्धी छन् ।

उनी यसअघि काठमाडौं–२ बाट निर्वाचित सांसद हुन् । तर, संसद्मा प्रखर रूपमा आफ्नो कुरा राखेको तर काठमाडौं–२ मा जनअपेक्षित काम गर्न नसकेको आरोप उनीमाथि छ ।

यस्तो अवस्थामा चितवन–३ मा उम्मेदवार दिएर चुनावी अभियानमा रहेकी सोविताले देशमा सही नेतृत्वको खडेरी टार्न राजनीतिमा आएको बताइन् ।