काठमाडौं । प्रधानमन्त्री सुशीला कार्कीले अन्तरिम सरकारलाई राष्ट्रिय स्वतन्त्र पार्टीको भन्नु गलत भएको बताएकी छिन् ।

केही मन्त्रीहरू राष्ट्रिय स्वतन्त्र पार्टीमा गएर चुनाव लड्न लाग्दैमा आफू नेतृत्वको सरकार उक्त पार्टीको नभएको दाबी गरिन् ।

‘यो अभियोग पनि यहाँ आयो कि यो त राष्ट्रिय स्वतन्त्र पार्टी हो भनेर । राष्ट्रिय स्वतन्त्र पार्टीमा दुई जना (सञ्चारमन्त्री जगदीश खरेल र खेलकुदमन्त्री बब्लु गुप्ता) मात्रै गए,’ उनले भनिन्, ‘कुलमानजीको आफ्नै पार्टी हो, पुनजीको पार्टी नै छैन । सबै मान्छे राष्ट्रिय स्वतन्त्र पार्टीमा गएका छैनन् । हाम्रो कसैसँग कुनै कन्ट्याक्ट पनि छैन। यो गलत भाष्य हो ।’

कार्की नेतृत्वको नागरिक सरकारको गठनको जग जेन–जी विद्रोह हो । यो विद्रोहको पर्दा पछाडिका सर्वोच्च कमान्डर काठमाडौं महानगरपालिकाका तत्कालीन प्रमुख बालेन्द्र शाह हुन् ।

जो प्रमुख पदबाट राजीनामा दिएर राष्ट्रिय स्वतन्त्र पार्टीको वरिष्ठ नेताको हैसियतमा छन् र सोही दलबाट झापा–५ मा उम्मेदवार बनेका छन् ।

विद्रोहको सर्वोच्च कमान्डर बालेन नै रास्वपाबाट संसदीय राजनीतिमा आएपछि कार्की सरकारलाई रास्वपाको सरकारको ट्याग लागेको छ ।

भनिन्छ, अन्तरिम सरकारको प्रधानमन्त्री छान्ने पनि बालेन नै हुन् ।