काठमाडौँ – विन्ध्यवासिनी फाउण्डेसनले ‘विन्ध्यवासिनी म्युजिक लाइफटाइम अचिभमेन्ट अवार्ड’ सङ्गीतकार शम्भूजीत बासकोटालाई प्रदान गर्ने भएको छ । उहाँलाई उक्त अवार्डसहित नगद रु एक लाख र सम्मानपत्र प्रदान गरिने छ ।

फाउन्डेसनको सल्लाहकार समितिको बैठकले ‘विन्ध्यवासिनी सङ्गीत साधना सम्मान’ गीतकार विजय शिवाकोटीलाई प्रदान गर्ने निर्णय गरेको अध्यक्ष लीना शर्मा रेग्मीले जानकारी दिनुभयो । उहाँलाई उक्त सम्मानसहित रु ५० हजार प्रदान गरिने छ । त्यसैगरी, ‘विन्ध्यवासिनी कला पत्रकारिता सम्मान’ पत्रकार पवन आचार्यलाई प्रदान गरिने भएको छ । सम्मानसहित उहाँलाई रु २५ हजार प्रदान गर्ने बैठकले निर्णय गरेको छ ।

बैठकले ‘प्रेमध्वज सङ्गीत रत्न सम्मान’ युवा गायिका रचना रिमाललाई प्रदान गर्ने निर्णय गरेको छ । विन्ध्यवासिनी फाउण्डेसनका सल्लाहकार तथा नेपाली सङ्गीत क्षेत्रका शिखर पुरूष स्वर्गीय प्रेमध्वज प्रधानको नाममा रहेको उक्त पुरस्कारको राशि रु २५ हजार रहेको छ ।

त्यसैगरी, ‘झलकमान लोक–सङ्गीत सम्मान लोकदोहोरी गायक पशुपति शर्मालाई प्रदान गरिने भएको छ । उहाँलाई रु २५ नगदसहित सम्मानपत्र प्रदान गरिने छ । फाउन्डेसनले यस वर्षदेखि अवार्डको विधा घटाएर पब्लिक च्वाइससमेत गरी ११ विधामा अवार्डबाट सम्मान गर्ने जनाएको छ । साथै हरेक विजेतालाई ट्रफीसहित रु पाँच हजार प्रदान गरिने अध्यक्ष रेग्मीले बताउनुभयो ।

विन्ध्यवासिनी म्युजिक अवार्डको १६औँ संस्करण आगामी चैत २७ गते राष्ट्रिय नाचघर जमलमा आयोजना गर्ने निर्णय गरिएको फाउन्डेसनले जनाएको छ ।