काठमाडौँ । जापानमा आइतबार सम्पन्न आम निर्वाचनमा प्रधानमन्त्री सनाई तकाइची नेतृत्वको लिबरल डेमोक्रेटिक पार्टी (एलडीपी)ले ऐतिहासिक बहुमत हासिल गरेको छ। ४ सय ६५ सदस्यीय प्रतिनिधि सभामा एलडीपीले मात्रै ३ सय ५२ सिट जित्दै दोश्रो विश्वयुद्धपछिको दुर्लभ उपलब्धि दोहोर्याएको छ। एकल पार्टीले दुई तिहाइभन्दा बढी बहुमत हात पार्नु जापानी राजनीतिमा अत्यन्तै असामान्य मानिन्छ।

यसअघि एलडीपीले सामान्य बहुमतसमेत पाउन नसकेर गठबन्धन सरकारको सहारामा सत्ता सञ्चालन गर्दै आएको थियो। लगातार घट्दो जनसमर्थन, आन्तरिक विवाद र विपक्षी दलहरूको बढ्दो प्रभावका कारण अघिल्लो चुनावमा पार्टी कमजोर बनेको थियो। तर, यसपटक प्रधानमन्त्री तकाइचीको नेतृत्व, स्थिर राजनीतिक दिशा, आर्थिक सुधारका प्रतिवद्धता तथा विदेश नीतिमा देखाएको स्पष्टताले मतदातालाई आकर्षित गरेको विश्लेषकहरूको भनाइ छ।

यो विजयसँगै तकाइची सरकार अब संविधान संशोधनदेखि दीर्घकालीन आर्थिक एजेन्डा कार्यान्वयनसम्मका योजनामा अघि बढ्न सक्षम हुने अनुमान गरिएको छ। विशेषगरी जापानको सुरक्षा नीति र सैन्य क्षमतामा सुधार गर्ने कुरालाई एलडीपीले आफ्नो प्रमुख एजेन्डा बनाउँदै आएको छ, जसका लागि संसदमा दुई तिहाइ बहुमत महत्वपूर्ण मानिन्छ।

निर्वाचन परिणामले विपक्षी दलहरू भने थप कमजोर बनेका छन्। मुख्य विपक्षी दलहरू बीच गठबन्धन निर्माण हुन नसक्दा र मतदातालाई विश्वसनीय विकल्प दिन नसक्दा एलडीपीको पक्षमा लहर बनेको विश्लेषण गरिएको छ।

एलडीपीको यो विजय जापानको आगामी राजनीतिक दिशालाई ठूलोरूपमा प्रभावित गर्ने निश्चित छ, साथै प्रधानमन्त्री तकाइचीको शक्ति र प्रभाव पनि समग्र रूपमा बढ्ने देखिएको छ।