काठमाडौं । दक्षिणी अफगानिस्तानको कन्धार प्रान्तमा शनिबार पाकिस्तानी सेनाले हमला गर्दा तीन अफगानीको मृत्यु भएको छ । सात जना घाइते भएका छन् ।

अफगानिस्तान सरकारका उपप्रवक्ता हम्दुल्लाह फित्रतले यो जानकारी दिएका हुन् । फित्रतले सामाजिक सञ्जाल एक्समा प्रकाशित वक्तव्यमा भनेका छन् कि पाकिस्तानी सेनाले शनिबार बिहान स्थानीय समयअनुसार ८ः३० बजे कन्धारमा फर्किएका व्यक्तिहरूको अस्थायी शिविरमा हवाई हमला तथा बमबारी गरेको थियो ।

यसैबीच सम्बन्धित घटनामा एक अफगान अधिकारीले पाकिस्तानबाट पठाइएको ड्रोन (पाइलटविहीन विमान) ले अफगानिस्तानको पूर्वी खोस्त प्रान्तमा आक्रमण गर्न खोज्दा शनिबार दुर्घटना भएको दाबी गरेका छन् ।

दुई छिमेकी देशहरूबीच सीमा क्षेत्रमा मिलिटेन्ट हिंसाको वृद्धिसँगै पछिल्ला दिनहरूमा तनाव बढेको छ । पाकिस्तानले अफगानिस्तानमा टीटीपी (तेहरीक–ए–तालिबान पाकिस्तान) जस्ता मिलिटेन्ट समूहहरूलाई आश्रय दिएको आरोप लगाउँदै आएको छ ।

अफगानिस्तानले पाकिस्तानी हमलाहरूले नागरिकहरूलाई लक्षित गरेको बताउँदै आएको छ । यो घटनाले दुवै देशबीच जारी सीमा तनावलाई थप जटिल बनाएको छ ।