काठमाडौं । श्रम संस्कृति पार्टीका अध्यक्ष तथा सुनसरी–१ बाट निर्वाचित प्रतिनिधिसभा सदस्य हर्क साम्पाङले मतदाताहरूलाई धन्यवाद दिएका छन् ।

निर्वाचनबाट निर्वाचित गराएर आफूलाई जनताको पक्षमा काम गर्ने अवसर दिएको भन्दै मतदाताहरूप्रति अभारसमेत प्रकट गरे ।

चुनाव क्षेत्रको टोलटोलमा पुगेर मतदाताहरूलाई नमस्कार भन्दै उनले भने, ‘आदरणीय आमाबुबा, दाजुभाइ, दिदीबहिनी, भाञ्जाभाञ्जी, जेन–जी सबैलाई धन्यवाद छ, तपाईंहरूले अमूल्य मत दिएर मलाई काम गर्ने अवसर दिनुभएको छ ।’

उनले मतदाताहरूसँग सल्लाह र सुझाव पनि मागेका छन् । कुनै माग र गुनासा भए त्यो पनि आफूलाई दिन उनले आग्रह गरे ।

आफू प्रतिनिधिसभा सदस्य निर्वाचित भए पनि जनतालाई नबिर्सिने र आफू जनतातिरै फर्किएर आउने बताए ।

साम्पाङले यही २१ फागुनमा भएको निर्वाचननमा राष्ट्रिय स्वतन्त्र पार्टी (रास्वपा) उम्मेदवार शरिन ख्युङ्बा तामाङ (गोमा)लाई पराजित गर्दै संसदको यात्रा तय गरेका हुन् ।