काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले सुर्खेतमा १६ वर्षीया बालिका इनिशा विकको सामूहिक बलात्कारपछि हत्या गरेकाे घटनाप्रति गहिरो दुःख व्यक्त गरेका छन् ।

प्रचण्डले उक्त आपराधिक घटनाले आफूलाई मर्माहत बनाएको उल्लेख गर्दै मृतक बालिकाप्रति श्रद्धाञ्जली अर्पण गरेका छन् । साथै उनले शोकाकुल परिवारजनप्रति गहिरो समवेदना व्यक्त गरेका छन् ।

उनले घटनाको निष्पक्ष, छिटो र प्रभावकारी छानबिन गर्न सरकारसँग माग गर्दै दोषीलाई कडा कानुनी कारबाही गर्नुपर्ने बताएका छन् । यस्ता जघन्य अपराधलाई कुनै पनि हालतमा सह्य गर्न नसकिने भन्दै उनले पीडितले न्याय पाउनुपर्नेमा जोड दिएका छन्।

प्रचण्डले राज्यका सम्बन्धित निकायले घटनालाई गम्भीरतापूर्वक लिएर सत्यतथ्य सार्वजनिक गर्नुपर्ने र दोषीमाथि कडा कारबाही गर्नुपर्ने बताएका छन्।