काठमाडौं । श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले रास्वपासँग दुई तिहाइनजिकको बहुमत भएकाले सरकार गठनमा ‘टालाटुली बाटुली’ नहुने बताएका छन् ।

उनले रास्वपाबाट बालेनको नेतृत्वमा सरकार गठन हुन लागेकोमा खुसी प्रकट गर्दै राष्ट्रिय हित र जनहितका पक्षमा सरकारसँग सहकार्य गर्न सकिने पनि बताए ।

तर, राष्ट्रहित र जनहितविपरीत सरकार अगाडि बढे विरोध गर्ने स्पष्ट पारे । अर्को प्रसङ्गमा उनले जेन–जी प्रतिवेदनलाई गम्भीर रुपमा हेरिनुपर्ने पनि बताए ।

‘मैले जेन–जी प्रतिवेदन पढ्न पाएको छैन । झण्डै हजार पेजको छ, पढ्न समय लाग्छ, तपाईंहरूबाटै मैले थाहा पाएँ,’ उनले पत्रकारहरूलाई बिहीबार सिंहदरबारमा भने, ‘जेन–जी प्रतिवेदनलाई गम्भीर रूपमा हेरिनुपर्छ ।’

साम्पाङ जेन–जी विद्रोहलगत्तै देश शून्यताको अवस्थामा छँदा प्रधानमन्त्री बन्ने भन्दै काठमाडौं आएका थिए । तर, प्रधानमन्त्री त के मन्त्रीसमेत भएनन् ।

यसपछि रुष्ट उनले सर्वाधिक आलोचना भावी प्रधानमन्त्री बालेन्द्र शाह ‘बालेन’को गरेका थिए ।