काठमाडौँ। स्व. उज्वल थापाको जीवनयात्रामा आधारित वृत्तचित्र ‘दिमाग घोच्ने मान्छे’ अब ओटीटीमार्फत विश्वभरि हेर्न सकिने भएको छ। डीगो ओटीटी प्लेटफर्ममा आधिकारिक रूपमा प्रदर्शनका लागि तयार भएपछि यो वृत्तचित्र विश्वका जुनसुकै स्थानबाट पहुँचयोग्य भएको हो। निर्माण टोलीका अनुसार प्रदर्शनबाट संकलित आम्दानीको मुख्य हिस्सा उज्वल थापा फाउन्डेसनलाई प्रदान गरिनेछ, ताकि थापाले सुरु गरेका सामाजिक तथा नागरिक अभियानहरूलाई संस्थागत रूपमा निरन्तरता दिन सहयोग पुगोस।

‘दिमाग घोच्ने मान्छे’ ले उज्वल थापाको बाल्ययात्रादेखि अमेरिकामा बिताएको शैक्षिक जीवन र नेपाल फर्किएपछि उद्यमशीलता तथा वैकल्पिक राजनीतिमार्फत परिवर्तन ल्याउने उनको प्रयासलाई गहिराइका साथ प्रस्तुत गर्छ। दुर्लभ फुटेज, उनका साथी, सहयात्री र आलोचकका कथनहरूले सिँगारेको यो वृत्तचित्रले समाजलाई प्रश्न गर्न र जिम्मेवारी लिन प्रेरित गर्ने व्यक्तिको जीवन दर्शन उजागर गर्छ। यो चलचित्र केवल एक व्यक्तिको कथामात्र नभई समृद्ध नेपालको कल्पना गर्ने हरेक नेपालीका लागि प्रेरणाको स्रोतको रूपमा प्रस्तुत गरिएको छ।

दर्शकहरूले डीगो ओटीटीको एपमार्फत यो वृत्तचित्र हेर्न सक्नेछन्। क्षेत्रअनुसार फरक फरक शुल्क तोकिएको छ। नेपालमा १९९ रुपैयाँ, अमेरिका र अष्ट्रेलियामा ४.९९ डलर तथा अन्य देशका दर्शकका लागि २.९९ डलर निर्धारण गरिएको छ।

उज्वल थापा फाउन्डेसन उज्वल थापाको विचार, सपना र नागरिक चेतनालाई जीवित राख्न सञ्चालन गरिएको संस्था हो। फाउन्डेसनले मुख्यतया युवा नेतृत्व विकास, वैकल्पिक राजनीति तथा नागरिक सशक्तीकरणका क्षेत्रमा निरन्तर काम गर्दै आएको छ।