काठमाडौं। सुदूरपश्चिम प्रदेश सरकारका पूर्वमन्त्री तथा प्रदेशसभा सदस्य प्रकाशबहादुर देउवा करिब सात महिनापछि सम्पर्कमा आएका छन्। उनले सभामुख भीमबहादुर भण्डारीलाई पत्र पठाउँदै लामो समय अनुपस्थित रहनुको कारण खुलाएका हुन्।

देउवाले आफू अमेरिका गएका बेला स्वास्थ्य समस्या देखिएपछि चिकित्सकको सल्लाहअनुसार उपचार र विश्राममा बस्नुपरेको जानकारी दिएका छन्। सोही कारण प्रदेशसभाका बैठकहरूमा उपस्थित हुन नसकेको र आगामी बैठकमा पनि सहभागी हुन नसक्ने अवस्था रहेको उनले उल्लेख गरेका छन्। स्वास्थ्यमा सुधार आएपछि नियमित रूपमा बैठकमा सहभागी हुने उनले बताएका छन्।

प्रदेशसभा नियमावली २०८० अनुसार लगातार १० बैठकमा बिनासूचना अनुपस्थित भए सदस्य पद नै जोखिममा पर्ने प्रावधान छ। देउवा हालसम्म ८ बैठकमा अनुपस्थित भइसकेका छन्। पद गुम्ने चर्चा बढेपछि उनले अमेरिकाबाटै सभामुखलाई पत्र पठाएको बताइएको छ।

देउवा नेपाली कांग्रेसका वरिष्ठ नेता शेरबहादुर देउवाका भतिजा हुन्। २०७९ को प्रदेशसभा निर्वाचनमा विजयी भएका उनले मुख्यमन्त्री बन्ने चाहना राखेका थिए। तर दलका नेता कमलबहादुर शाह मुख्यमन्त्री बनेपछि देउवा भौतिक पूर्वाधार विकासमन्त्री बनेका थिए।

पछिल्लो समय देउवा र मुख्यमन्त्री शाहबीच सम्बन्धमा दूरी बढेको बताइन्छ। कार्यशैलीप्रति असन्तुष्टि जनाउँदै देउवाले अनौपचारिक रूपमा आलोचना गर्दै आएका थिए भने मुख्यमन्त्री शाहले पनि आफूलाई आन्तरिक रूपमा असहयोग भइरहेको टिप्पणी गर्दै आएका थिए।