काठमाडौं। आगामी जेठ महिनाबाट छायाङ्कनमा जाने तयारीमा रहेको फिल्म ‘एक्का तीन’मा अभिनेत्री पूजा शर्माको जोडीका रूपमा अभिनेता पुष्प खड्का चयन भएका छन्। निर्माण युनिटले बुधबार पुष्प खड्का फिल्ममा अनुबन्धित भएको जानकारी दिएको हो।

अब फिल्ममा पूजा र पुष्प प्रेमी-प्रेमिकाको भूमिकामा देखिनेछन्।  फिल्मको निर्देशन रुपेश तामाङले गर्ने भएका छन्। यसअघि नै पूजा शर्मा मुख्य भूमिकाका लागि फाइनल भइसकेकी थिइन्।

एक्सन जनरामा निर्माण हुने उक्त फिल्ममा एक-एक जना नव-नायक र नव-नायिकालाई समेत भित्राउने तयारी गरिएको छ।  फिल्मको कथा सुमन गजमेरले लेखेका हुन् भने फिल्मलाई जुना फिल्मस् र अधिरा फिल्मस्ले निर्माण गर्ने भएका छन्।

पुष्प खड्का र पूजा शर्माले यसअघि फिल्म ‘३६ को आँकडा’मा पनि सँगै काम गरिसकेका छन्। उनीहरूले केही म्युजिक भिडियोमा समेत सहकार्य गरेका छन्।