काठमाडौं। प्रतिनिधि सभा सदस्य महावीर पुनले नेपालमा लामो समयदेखि जरा गाडेर बसेको नातावाद, कृपावाद, चाप्लुसीवाद र चाकरीवादजस्ता प्रवृत्तिबाट सरकार, राजनीतिक दल र सांसदहरू मुक्त हुनुपर्ने बताएका छन्।

बुधबार प्रतिनिधिसभाको बैठकको विशेष समयमा बोल्दै उनले यस्ता प्रवृत्ति नेपालको इतिहासदेखि नै कायम रहेको उल्लेख गर्दै सांसदहरु यसबाट मुक्त हुनुपर्ने बताएका हुन्। नेपाल एकीकरणपछि रणबहादुर शाहको बाल्यकालमा शासन सञ्चालनका क्रममा नै यस्तो प्रवृत्तिको सुरुआत भएको उनको भनाइ थियो।

राणा शासनको अन्त्य, प्रजातन्त्रको स्थापना र गणतन्त्रको अभ्यासपछि पनि यस्ता विकृति विभिन्न रूपमा कायम रहेको उनले बताए। यी प्रवृत्तिले देशको विकास र सुशासनमा गम्भीर असर पारेको उल्लेख गर्दै उनले यसलाई अन्त्य गर्न तत्काल पहल आवश्यक रहेको धारणा राखे।

पुनले सरकार, राजनीतिक दलका नेता तथा सांसदहरूले व्यक्तिगत स्वार्थभन्दा माथि उठेर योग्य र निष्पक्ष व्यक्तिलाई अवसर दिनुपर्नेमा जोड दिए। त्यसो गर्न सके मात्र मुलुकमा दिगो विकास र सुशासन सुनिश्चित हुने उनको भनाइ थियो।