काठमाडाैं। कुनै पनि सैन्य कार्यक्रममा सहभागी नहुने सरकारले जनाएको छ। 

शासकीय सुधारका लागि तयार पारिएको १८ बुँदे राष्ट्रिय प्रतिबद्धतापत्रको मस्यौदा सार्वजनिक गर्ने क्रममा सरकारले सैन्य गठजोड, हातहतियारको प्रतिस्पर्धा र युद्धले शान्तिमा नकारात्मक असर पार्ने मान्यताका आधारमा समदुरी र समनिकटताको विदेश नीति अवलम्बन गर्ने जनाएको हो।

सरकारले कूटनीतिक प्राथमिकताको केन्द्रमा “नेपाल प्रथम, नेपाली प्रथम” भन्ने अवधारणा राखेर अघि बढ्ने प्रतिबद्धता पनि व्यक्त गरेको छ। साथै, आर्थिक कूटनीतिलाई सुदृढ बनाउने लक्ष्यसहित ‘सगरमाथा संवाद’ कार्यक्रमलाई निरन्तरता दिने उल्लेख गरिएको छ।

त्यसैगरी, सरकारले राष्ट्रिय प्रतिबद्धतामा नेपालको सार्वभौमसत्ता र राष्ट्रिय हितलाई सर्वोपरि राख्दै देशलाई ‘बफर स्टेट’बाट ‘भाइब्रेन्ट ब्रिज’मा रूपान्तरण गर्ने लक्ष्य राखेको जनाएको छ।

यसका लागि त्रिपक्षीय आर्थिक साझेदारी र क्षेत्रीय कनेक्टिभिटीमार्फत राष्ट्रिय हित सुनिश्चित गर्ने नीति अपनाइने पनि मस्यौदामा उल्लेख गरिएको छ।