काठमाडौं । धनुषाको मिथिला नगरपालिका-७, ढल्केबरस्थित जनकपुर रिफाइनरीमा गएराति ठूलो आगलागी भएको छ।

रिफाइनरीका प्रबन्धक सञ्जय गुप्ताका अनुसार आगलागीबाट करिब १५ करोड रुपैयाँ बराबरको क्षति पुगेको छ। रिफाइनरीमा जडान गरिएका स्टिम र थर्मोफुल मेसिन पूर्ण रूपमा जलेका छन्।

आगो नियन्त्रणमा लिन जनकपुर, महेन्द्रनगर र ढल्केबरबाट आएका पाँचवटा वारुणयन्त्र तथा नेपाल प्रहरी, सशस्त्र प्रहरी बल र नेपाली सेनाको संयुक्त टोली खटिएको थियो। उनीहरूको करिब दुई घण्टाको प्रयासपछि आगो निभाइएको हो।

इलाका प्रहरी कार्यालय ढल्केबरका प्रहरी निरीक्षक लक्ष्मण केसीले क्षतिको विस्तृत विवरण सङ्कलन गर्न अझै केही दिन लाग्ने बताए। आगलागीको कारण भने अहिलेसम्म खुल्न सकेको छैन।