काठमाडौं। फिल्म राम नाम सत्य ले प्रदर्शनको केही दिनमै बक्स अफिसमा उल्लेखनीय कमाई गरेको छ ।

चैत्र २७ गतेदेखि प्रदर्शनमा आएको उक्त फिल्मले सोमबारसम्म करिब ३ करोड २० लाख रुपैयाँ ग्रस कलेक्शन गरेको वितरक गोविन्द शाहीले जानकारी दिएका छन् ।

यसअघि शनिबारसम्म विकास बोर्डको तथ्यांकअनुसार फिल्मको कमाई करिब २ करोड ८० लाख रुपैयाँ रहेको थियो । केही हलहरूको व्यापार विवरण बोर्डमा समावेश नहुँदा वितरकको हिसाबमा कमाई अझै बढी देखिएको बताइएको छ ।

निर्माण पक्षका अनुसार फिल्मले अमेरिकाबाहेक अन्य विदेशी बजारबाट करिब ७० लाख रुपैयाँ आम्दानी गरिसकेको छ । अमेरिकाका विभिन्न शहरमा अप्रिल २४ देखि २०० शोसहित प्रदर्शन सुरु हुने तयारी गरिएको छ । त्यहाँ फिल्मलाई शेयर प्रतिशतमा बिक्री गरिएको हुँदा थप आम्दानी हुने अपेक्षा गरिएको छ ।

निर्देशक माइकल चन्दका अनुसार डिजिटल प्लेटफर्म ओएसआर डिजिटल मार्फत फिल्मको डिजिटल अधिकार ७२ लाख रुपैयाँमा बिक्री गरिएको छ, जसले निर्माण पक्षलाई आर्थिक रूपमा सहयोग पुगेको छ ।

करिब ३ करोड रुपैयाँ बजेटमा बनेको फिल्मले अहिलेको कमाईलाई हेर्दा लगानी सुरक्षित गर्ने दिशातर्फ अग्रसर देखिएको निर्माण पक्षको भनाइ छ ।

स्वेता विमली र उपेन्द्र शाहीको निर्माणमा तयार भएको यस फिल्ममा विराज भट्ट, सुशील श्रेष्ठ, दिव्या रायमाझी, सुपुष्पा भट्ट, आयुष सिंह ठकुरी, खुशी कार्की, सुनील थापा र प्रशान्त ताम्राकार लगायत कलाकारहरूको अभिनय रहेको छ ।

पछिल्लो समय नेपाली फिल्महरूको व्यापार सन्तोषजनक नरहेको अवस्थामा यस फिल्मले भने बक्स अफिसमा सकारात्मक संकेत देखाएको निर्माण पक्षले जनाएको छ ।