काठमाडौं।  गृहमन्त्री सुदन गुरुङको राजीनामापछि नेपाली मनोरञ्जन क्षेत्रका सेलिब्रेटीहरूले पनि सामाजिक सञ्जालमार्फत आफ्नो धारणा सार्वजनिक गर्न थालेका छन् । यस क्रममा अभिनेत्री वर्षा राउतको एउटा व्यङ्ग्यात्मक पोस्ट विशेष चर्चामा आएको छ ।

राउतले आफ्नो नयाँ फिल्म ‘मालती मंगले’ का अभिनेता विजय बराललाई संकेत गर्दै राजनीतिक शैलीको व्यङ्ग्य प्रस्तुत गरेकी हुन् ।

उनले लेखेकी छिन्,‘दूर-दूरसम्म सम्बन्ध रहेकै आधारमा यसरी मान्छे फस्दै जाने हो भने, जुन हिसाबले विजय बरालले चाउचाउ खान्छन्, कि त कारबाही हुनुपर्यो कि त नैतिकताका आधारमा चाउचाउ खान छोड्नु पर्छ ।’

उनको यो स्टाटसलाई सामाजिक सञ्जाल प्रयोगकर्ताहरूले हल्का-फुल्का राजनीतिक व्यङ्ग्यका रूपमा लिएका छन् । पछिल्लो राजनीतिक घटनाक्रमलाई जोडेर गरिएको यो टिप्पणीले हास्य र व्यङ्ग्यको शैलीमा सार्वजनिक बहस प्रस्तुत गरेको देखिन्छ ।

यसअघि पनि गृहमन्त्री सुदन गुरुङको राजीनामापछि अभिनेता तथा निर्देशक आशिफ शाह लगायत विभिन्न कलाकारहरूले सुशासन र जवाफदेहिताबारे आफ्ना विचार सार्वजनिक गरेका थिए ।

सेलिब्रेटीहरूको यस्ता अभिव्यक्तिहरूले पछिल्ला राजनीतिक घटनाक्रमलाई जनस्तरमा फरक ढङ्गले प्रस्तुत गर्दै सामाजिक सञ्जालमा व्यापक बहस सिर्जना गरिरहेको देखिन्छ ।

यस्तै,नायिका प्रियंका कार्कीले गृहमन्त्रीबाट राजीनामा दिएका गुरुङ झन् बलियो भएर फर्किने विश्वास व्यक्त गरेकी छन् ।

कार्कीले गुरुङको राजीनामापछि सामाजिक सञ्जालमार्फत् उनको पक्षमा ऐक्यबद्धता जनाउँदै कहिलेकाहीँ सबैभन्दा बलिया मानिसहरूले नै जीवनमा सबैभन्दा कठिन परीक्षा दिनुपर्ने उल्लेख गरेकी छन् ।

उनले गुरुङमाथि ‘मिडिया ट्रायल’ भएको टिप्पणी समेत गरेकी छन् । उनले नेपालले अझै सुधन गुरुङभित्रको शक्ति, भिजन  र सम्भावनाको पूर्ण उचाइ देख्न बाँकी रहेको पनि उल्लेख गरेकी छन् ।