सल्यान। जिल्ला अस्पताल सल्यानमा बन्द रहेको शल्यक्रिया सेवा करिब १० दिनपछि पुनः सञ्चालनमा आएको छ। विशेषज्ञ डाक्टरको अभावका कारण चैत २८ गतेदेखि रोकिएको सेवा मंगलबारबाट पुनः सुरु गरिएको स्वास्थ्य सेवा कार्यालय सल्यानले जनाएको हो।

अस्पतालमा मेडिकल अधिकृत डा. सुमन यादव आएपछि शल्यक्रिया सेवा पुनः सुचारु भएको कार्यालयले जानकारी दिएको छ। जिल्ला अस्पताल सल्यानका प्रमुख डा. अर्जुनकुमार बुढामगरका अनुसार कर्णाली प्रदेशको सामाजिक विकास मन्त्रालयबाट गाइनोकोलोजिस्ट पठाउने प्रक्रिया पनि अघि बढाइएको छ।

मेडिकल अफिसरको व्यवस्थापनसँगै शल्यक्रिया सेवा सुरु भएको र गाइनोकोलोजिस्टसमेत आएपछि सेवा प्रवाह अझ सहज हुने अपेक्षा गरिएको छ।

शल्यक्रिया सेवा बन्द हुँदा जिल्लाका बिरामीहरूलाई ठूलो सास्ती खेप्नुपरेको थियो। सामान्य शल्यक्रियाका लागि समेत बिरामीहरू दाङ, सुर्खेत र नेपालगञ्ज जान बाध्य भएका थिए।