काठमाडौं। ‘फेन्टासी कमेडी ड्रामा’ विधामा निर्माण भएको फिल्म ‘लाइफ ड्यामेज’ मा समावेश गीत ‘ब्युटिफुलम’ सार्वजनिक गरिएको छ ।

जेठ १ गते प्रदर्शनमा आउने तयारीमा रहेको फिल्मको उक्त गीत राजधानी काठमाडौंमा आयोजित एक कार्यक्रममा रिलिज गरिएको हो ।

सार्वजनिक डान्सिङ नम्बरमा एसडी योगीको संगीत, आदर्श सुशीलको शब्द तथा एसडी योगी र रेश्मा पुनको स्वर रहेको छ । गीतको भिडियोको कोरियोग्राफी किरण थापाले गरेका हुन् ।

भिडियोमा फिल्मका मुख्य कलाकारहरू प्रस्तुत छन् । केही वर्षयता कन्टेन्ट क्रियटरका रूपमा परिचित निमेष श्रेष्ठले यस फिल्ममार्फत निर्देशनमा डेब्यु गरेका छन् । उनले अभिनेत्री सुरक्षा पन्तसँग स्क्रिन सेयर पनि गरेका छन् ।

फन रिभोलुसन इन्टरटेनमेन्टको ब्यानरमा निर्माण भएको फिल्ममा सुरक्षा पन्त र निमेष श्रेष्ठसँगै ईशा थापा, सञ्जना महर्जन, अमोघ अर्याल, अनिश जंग थापा, अजय पन्त, सविन बाँस्तोला, निर्मला खड्कालगायत कलाकारहरूको अभिनय रहेको छ ।

फिल्मको कथा निमेष श्रेष्ठ, ईशा थापा र अभिषेक खरेलले संयुक्त रूपमा लेखेका हुन् । पहिलोपटक निर्देशनमा हात हालेका श्रेष्ठले ‘लाइफ ड्यामेज’ दर्शकका लागि मनोरञ्जनात्मक र फरक स्वादको ‘फेन्टासी कमेडी ड्रामा’ हुने बताएका छन् ।

कार्यक्रममा बोल्दै उनले फिल्म अन्त्यसम्म रमाइलो बनेको र दर्शकको मन जित्नेमा आफू विश्वस्त रहेको बताए ।

अभिनेत्री सुरक्षा पन्तले चलचित्रको अवधारणा मन परेकाले आफूले काम गरेको बताइन् ।

फिल्ममा प्रवीण खड्काको छायांकन र बिकेन कार्कीको सम्पादन रहेको छ ।