बुटवल । गर्भपतन गराउने क्रममा मृत्यु भएकी पाल्पाको बगनासकाली गाउँपालिका-२ निवासी २९ वर्षीया गीता पाण्डेको शव परिवारले बुझेपछि अन्त्येष्टि गरिएको छ।

नेपाल मेडिकल काउन्सिलले छानबिन समिति गठन गरी अनुसन्धान सुरु गरेपछि परिवारले शव बुझेको हो। पाण्डेको शुक्रबार पाल्पास्थित राम्दी खोलामा अन्तिम संस्कार गरिएको उनका आफन्त पर्सुराज अर्यालले जानकारी दिएका छन्।

पाण्डेको बुटवलस्थित खत्री नर्सिङ होम, जोनल र इन्दुलेखा फार्मेसीमा उपचारका क्रममा घुमाइँदै गर्दा मृत्यु भएको आरोप छ। उनी १२ हप्ताको गर्भवती थिइन्।

घटनामा संलग्न दुई चिकित्सकसहित पाँच जना स्वास्थ्यकर्मीलाई प्रहरीले नियन्त्रणमा लिएर अनुसन्धान अघि बढाएको छ। यसैबीच, नेपाल मेडिकल काउन्सिलका सदस्य डा. सम्राट पराजुलीको संयोजकत्वमा ६ सदस्यीय छानबिन समिति गठन गरिएको छ।