काठमाडौं। बलिउडका ‘किङ खान’ शाहरुख खानले आफ्नो ब्लकबस्टर फिल्म ‘जवान’ को दोस्रो शृङ्खला ‘जवान २’ निर्माण गर्ने तयारी थालेका छन्। फिल्म ‘किङ’ को सुटिङ सकिएपछि उनी यस प्रोजेक्टमा पूर्ण रूपमा केन्द्रित हुने बताइएको छ।

पछिल्लो केही महिनादेखि गोप्य रूपमा लेखिँदै आएको ‘जवान २’ को स्क्रिप्ट हाल अन्तिम चरणमा पुगेको निर्माण पक्षले जनाएको छ।

पहिलो भागमा शक्तिशाली भिलेनको भूमिका निर्वाह गरेका विजय सेतुपति लाई दर्शकले निकै रुचाएका थिए। त्यसैले यसपटक पनि निर्माण टिमले कुनै चर्चित दक्षिण भारतीय सुपरस्टारलाई भिलेनका रूपमा ल्याउने योजना बनाएको छ।

फिल्मका निर्देशक एट्ली कुमार ले ‘जवान’ मार्फत हिन्दी सिनेमामा ठूलो सफलता हासिल गरेका थिए। उनकै निर्देशनमा बन्न लागेको ‘जवान २’ लाई पहिलेभन्दा अझ भव्य र ठूलो स्केलमा निर्माण गर्ने तयारी भइरहेको छ।

निर्माण पक्षका अनुसार स्क्रिप्टको आवश्यकताअनुसार कास्टिङमा ठूला घोषणा चाँडै हुने सम्भावना छ। फिल्मको छायांकन आगामी वर्ष सुरु हुने अपेक्षा गरिएको छ।

सन् २०२३ मा रिलिज भएको ‘जवान’ ले विश्वभर करिब ११०० करोड रुपैयाँभन्दा बढीको कलेक्सन गर्दै बक्स अफिसमा ऐतिहासिक सफलता हासिल गरेको थियो। फिल्ममा नयनतारा र विजय सेतुपति प्रमुख भूमिकामा थिए भने दीपिका पादुकोण विशेष भूमिकामा देखिएकी थिइन्।

‘जवान २’ को खबर सार्वजनिक भएसँगै शाहरुखका प्रशंसकहरूमा उत्साह बढेको छ।