काठमाडौं । झण्डै १८ लाख पर्ने ६ तोला सुन भेटेर दिएपछि स्याङ्जाका लोकबहादुर थापाको तारिफ जताजतैबाट भइरहेको छ ।

उनले ३२ वर्षीया अनिता अधिकारीको सुन भएको झोला भेटेका थिए । भेटे लगत्तै खोलेर हेर्दा १८ लाख जति पर्ने ६ तोला सुन देखेपछि उनले प्रहरीलाई तत्काल खबर गरेका थिए ।

उता अनिताले पनि केहीबेरमा प्रहरीलाई आफ्नो सुनसहितको झोला हराएको भनेर खबर गरिन् । प्रहरीले दुवैलाई भेट गराए । इमानी लोकबहादुरले सुनसहित भेटेको झोला अनिताले बुझाए ।

अनिताको खुसीको सीमा रहेन । अनिताले लोकबहादुरलाई सम्मान गर्दै खादा लगाइदिइन् । धन्यवाद दिइन् । लोकबहादुरको इमानप्रति उनको शीर झुक्यो ।

यो प्रसङ्ग शनिबारको हो । स्याङ्जाको पुतलीबजार नगरपालिका–१० राङखोला बस्ने ३२ वर्षीया अनिता अधिकारी स्कुटरमा स्याङ्जाबाट पोखरा जाँदै थिइन् । सुनका गरगहनासहितको व्याग खसेको उनलाई पत्तै भएन ।

तर, इमानी ट्याक्सी चालक लोकबहादुर थापाले पुतलीबजार नगरपालिका–३ स्थित मजुवामा गहनासहितको झोला भेटाए । जहाँ भेटियो, सिक्री २ तोला, हार १ तोला, बेरूवा २ थान, पोतेसहितको सुनको माला १ थान, चन्द्रमा १ थान ।

यति धेरै सुनसहितको झोला इमानपूर्वक लोकबहादुरले फिर्ता गरेको खबरपछि लोकबहादुरको तारिफ भइरहेको छ ।