काठमाडौं । सरकारले अध्यादेश ल्याउने तयारी गरेको छ। आह्वान भइसकेको संघीय संसद् अधिवेशन स्थगित गरेपछि सरकारले अध्यादेशमार्फत केही कानुनी व्यवस्था अघि बढाउने तयारी गरेको हो।

स्रोतका अनुसार सोमबार दिउँसो बस्ने मन्त्रिपरिषद् बैठकबाट संवैधानिक परिषद् सम्बन्धी लगायतका अध्यादेश ल्याउने प्रस्ताव अघि बढाइनेछ।

यसअघि सरकारको सिफारिसमा राष्ट्रपति रामचन्द्र पौडेलले वैशाख १७ गतेका लागि संघीय संसद् अधिवेशन आह्वान गरेका थिए। तर त्यसको भोलिपल्टै सरकारकै अर्को सिफारिसमा उक्त अधिवेशन स्थगित गरिएको थियो।

अधिवेशन स्थगित भएपछि सरकारले आवश्यक कानुन निर्माणका लागि अध्यादेशको बाटो रोज्ने तयारी गरेको छ। अध्यादेशमार्फत तत्काल आवश्यक नीतिगत तथा संवैधानिक व्यवस्थामा परिवर्तन गर्न खोजिएको बताइएको छ।