काठमाडौं । माइतीघर मण्डलामा नेकपा एमाले नेता महेश बस्नेतकी पत्नी अम्बिका र शोभा पाठकबीच झडप भएको छ। प्रहरीले स्थिति नियन्त्रणमा लिँदै अम्बिकासहित केही महिलालाई नियन्त्रणमा लिएको छ। घटना दिउँसो करिब १२ बजेतिर भएको हो।

प्राप्त विवरणअनुसार शोभा पाठक, रस्मिला धामीलगायत युवतीहरू पूर्वगृहमन्त्री सुधन गुरुङको पुनर्वहालीको माग गर्दै माइतीघरमा धर्नामा बसिरहेका थिए। सोही क्रममा अम्बिका समूहसहित त्यहाँ पुगेपछि उनीहरूबीच विवाद चर्किएको र झडपको अवस्था सिर्जना भएको बताइएको छ।

प्रत्यक्षदर्शीका अनुसार दुवै पक्षबीच भनाभनपछि हात हालाहाल भएको थियो। त्यसपछि प्रहरीले हस्तक्षेप गर्दै भिड छुट्याएको र अम्बिका लगायत केही महिलालाई नियन्त्रणमा लिएर गएको हो।

घटनाबारे थप विवरण आउन बाँकी छ।

यसअघि शोभा पाठकले महेश बस्नेतविरुद्ध कारबाहीको माग गर्दै अनशन बसेकी थिइन्। त्यसक्रममा तत्कालीन गृहमन्त्री सुधन गुरुङले उनलाई भेट गरेका थिए। गुरुङले राजीनामा दिएपछि उनले अनशन तोडेकी थिइन् र हाल पुनः गुरुङको पुनर्वहालीको माग गर्दै आन्दोलनमा सक्रिय छिन्।