काठमाडौँ ।  राष्ट्रिय स्वतन्त्र पार्टीकी सांसद ज्वाला संग्रौलाले श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङप्रति कडा प्रतिक्रिया व्यक्त गरेकी छन्। सुकुम्बासी बस्तीकी अलपत्र परेकी बालिका र प्रधानमन्त्री बालेन्द्र शाहकी छोरीको तस्बिर एकैसँग राखेर साम्पाङले फेसबुकमा ‘चुपचाप सरकारको पारा मिलेन है’ भन्दै व्यंग्य गरेका थिए। उक्त पोस्टलाई शेयर गर्दै संग्रौलाले, ‘माननीय हर्क साम्पाङ, तपाईं सुध्रिने मान्छे होइन’ भनेर प्रतिवाद गरेकी छन्।

संग्रौलाले यतिमै नरोकी साम्पाङका तीन वटा पोस्टहरू क्रमशः शेयर गर्दै थप आलोचना गरेकी छिन्। दोस्रो पोस्ट शेयर गर्दै उनले, “हाम्रो राजनेतालाई ग्रीन टी उपहार आइलाग्यो कि क्या हो?” भनेर टिप्पणी गरेकी छन्। यो पोस्टमा साम्पाङले सुकुम्बासी बस्ती भत्काइएको विरोध गर्दै ‘रवि लामिछाने जी, डोजर रोक्न अब तपाईंले नै प्रधानमन्त्री बन्नुपर्‍यो’ भनेर लेखेका थिए।

तेस्तै, तेस्रो पोस्टमा साम्पाङले “जसले भस्मे खोरिया फोडेर बस्ती बसायो, उसैलाई सुकुम्बासी बनाएर लखेट्ने तिमी को हो?” भन्दै सरकारलाई प्रश्न गरेका थिए। उक्त पोस्ट शेयर गर्दै संग्रौलाले प्रत्युत्तर दिँदै लेखेकी छन्, ‘सुकुम्बासी र हुकुमबासीको पहिचान त दिनुस्, न हर्क साम्पाङज्यू। त्यसपछि ‘तिमी को हौ’ को जवाफ आफैँ कामले दिन्छ।’