काठमाडौँ । सरकारले संसद्को चालु अधिवेशन स्थगित गरी दुई वटा अध्यादेश जारी गर्ने तयारी गरेको छ। सोमबार बसेको मन्त्रिपरिषद् बैठकले संवैधानिक परिषद् सम्बन्धी र सहकारी सम्बन्धी अध्यादेश ल्याउने निर्णय गर्दै राष्ट्रपतिसमक्ष सिफारिस गरेको हो।

राष्ट्रपतिका प्रेस सचिवालयका अनुसार सिफारिस गरिएका अध्यादेशहरूबारे राष्ट्रपति रामचन्द्र पौडेलले अध्ययन गरिरहेका छन्।

यसअघि गत वैशाख ८ गतेको मन्त्रिपरिषद् बैठकले संसद् अधिवेशन आह्वान गर्न राष्ट्रपतिसमक्ष सिफारिस गरेको थियो, जसअनुसार राष्ट्रपति पौडेलले वैशाख १७ गतेका लागि अधिवेशन बोलाएका थिए। तर पछि सरकारले विशेष कारण देखाउँदै उक्त प्रक्रिया रोकेको थियो।

संसद् सञ्चालनमै रहेको अवस्थामा अध्यादेश ल्याउन कानुनी तथा संवैधानिक जटिलता हुने भएकाले सरकारले संसद् छल्ने विकल्पस्वरूप अध्यादेशको बाटो रोजेको देखिएको छ।