काठमाडौँ । उच्च अदालत पाटनले नेपाली चलचित्र ‘लाली बजार’को प्रदर्शन रोक्न आदेश दिएको छ। न्यायाधीश प्रकाश ढुङ्गानाको एकल इजलासले मंगलबार अल्पकालीन अन्तरिम आदेश जारी गर्दै चलचित्र प्रदर्शन नगर्न निर्देशन दिएको हो।

चलचित्र ‘लाली बजार’ वैशाख १८ गते (शुक्रबार)देखि प्रदर्शनमा आउने तयारीमा थियो।

रोशनी नेपालीले दायर गरेको रिटमाथि सुनुवाइ गर्दै अदालतले सञ्चार तथा सूचना प्रविधि मन्त्रालयलाई समेत कारण देखाऊ आदेश जारी गरेको छ। साथै, वैशाख २२ गतेका लागि अर्को पेशी तोकिएकाले सो अवधिसम्म चलचित्र प्रदर्शनमा रोक लगाइएको छ।

यम थापाको निर्देशनमा बनेको उक्त चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे र आशा पौडेल लगायत कलाकारहरूको अभिनय रहेको छ।