काठमाडौं। बुद्धनगरस्थित बागमती नदी किनारका बासिन्दाले आफ्नो घरअगाडि जग्गाको लालपूर्जा र घरको नक्सा टाँसेका छन्।

वैधानिक कागजात भए पनि हुलमुलमा डोजर चल्न सक्ने डरका कारण यस्तो कदम चालिएको स्थानीयले बताएका छन्। उनीहरूका अनुसार कागजात हुँदाहुँदै पनि संरचना भत्किने आशंका बढेपछि प्रमाण देखिने गरी घरअगाडि नै टाँसिएको हो।

यद्यपि, अधिकांशले अझै घरका सामान सारेका छैनन्। भत्काउने सूचीमा परेका तर आवश्यक कागजात भएका बासिन्दाले आफू वैधानिक रहेको देखाउन यस्तो उपाय अपनाएको जनाइएको छ।

अनधिकृत संरचना हटाउने अभियानअन्तर्गत उक्त क्षेत्रमा डोजरसमेत पुगिसकेको छ, जसले स्थानीयमा थप त्रास सिर्जना गरेको छ।