काठमाडौं। आज विश्व हाँसो दिवस मनाइँदैछ। हरेक वर्ष मे महिनाको पहिलो आइतबार मनाइने यो दिवस हाँसोमार्फत शान्ति, सद्भाव र मानवीय भातृत्वको सन्देश फैलाउने उद्देश्य राखेर स्थापित गरिएको हो।

हाँसोलाई तनावमुक्त जीवन, सकारात्मक सोच र सामाजिक सम्बन्ध सुदृढ गर्ने प्रभावकारी माध्यमका रूपमा हेरिने भएकाले यो दिवस अहिले विश्वका धेरै देशमा उत्साहपूर्वक मनाइन्छ।

सामूहिक हाँसो कार्यक्रम, स्वास्थ्य परिचर्चा, सामुदायिक भेला तथा सामाजिक सन्देशसहित विभिन्न गतिविधिहरू आयोजना गरेर विश्व हाँसो दिवसले खुशी र एकताको भावना प्रवाह गर्दै आएको छ।

हाँस्नुका स्वास्थ्य फाइदा 

हाँसो आफैँमा एक प्राकृतिक उपचार विधि हो, जसले शरीर र मन दुवैलाई स्वस्थ, हल्का र सक्रिय राख्न मद्दत गर्छ। यसले थकान हटाउने, स्फूर्ति बढाउने र सकारात्मक सोच विकास गर्ने काम गर्छ।

हाँस्दा मुटुको गतिविधि सक्रिय हुन्छ र रक्तसञ्चार राम्रो हुन्छ। शरीरमा एन्डोर्फिन नामक हर्मोन उत्पादन हुन्छ, जसले मुटुलाई मजबुत बनाउन सहयोग पुर्‍याउँछ। नियमित हाँस्ने बानीले हृदयसम्बन्धी रोग र हृदयघातको जोखिम घटाउन मद्दत गर्छ।

खुला मनले हाँस्दा शरीरमा अक्सिजनको मात्रा बढ्छ। पर्याप्त अक्सिजनले शरीरको प्रतिरक्षा प्रणालीलाई सुदृढ बनाउन मद्दत गर्छ र विभिन्न हानिकारक तत्वसँग लड्ने क्षमता बढाउँछ।

बिहानको समयमा हास्य ध्यान वा रमाइलो अभ्यास गर्दा दिनभर मन प्रसन्न रहन्छ। यसले तनाव घटाउन, मानसिक थकान कम गर्न र सकारात्मक ऊर्जा प्रदान गर्न सहयोग गर्छ।

खुला मनले हाँस्दा शरीरमा नयाँ ऊर्जा सञ्चार हुन्छ। यसले मानिसलाई फुर्तिलो र उत्साहित बनाउँछ, जसले दैनिक काममा प्रभावकारीता बढाउँछ।

नियमित हाँस्ने बानीले क्यालोरी खर्च हुन्छ। अनुमानअनुसार लामो समयसम्म हाँस्दा ऊर्जा खपत बढ्ने भएकाले तौल नियन्त्रणमा समेत सहयोग पुग्न सक्छ।

कसरी हाँस्ने?
हाँस्नका लागि विशेष कारण आवश्यक पर्दैन, तर सकारात्मक वातावरण चाहिन्छ। रमाइला भिडियो हेर्ने, चुट्किला पढ्ने, साथीभाइसँग रमाइलो गर्ने वा परिवारसँग हल्का ठट्टा गर्ने जस्ता गतिविधिले हाँसो बढाउन सक्छ। दैनिक जीवनलाई हल्का रूपमा लिन सक्दा पनि सहज रूपमा हाँसो आउन सक्छ।