चितवन। चितवन राष्ट्रिय निकुञ्जमा चालु आर्थिक वर्षमा पाटेबाघको मृत्युका घटनाहरू बढेका छन्। पछिल्लो पटक सोमबार सिजीघाट नजिक करिब दुई वर्षको एक भाले बाघ मृत अवस्थामा फेला परेपछि यस वर्ष मरेका बाघको संख्या ६ पुगेको हो।

निकुञ्जका सूचना अधिकारी अविनाश थापामगरका अनुसार मृत भेटिएका बाघमध्ये दुई वटा भाले र तीन वटा पोथी रहेका छन्। भने एउटा बाघको लिङ्ग पहिचान हुन सकेको छैन।

उनका अनुसार केही बाघ आपसमा जुधेर मरेका छन् भने केही उद्धार प्रक्रियाकै क्रममा ज्यान गुमाएका छन्। एउटा बाघ भने प्राकृतिक कारणले मरेको अनुमान गरिएको छ।

अघिल्लो गणनाअनुसार चितवन राष्ट्रिय निकुञ्ज मा १२८ वटा पाटेबाघ रहेका थिए। यस वर्ष गरिएको नयाँ गणनाको नतिजा भने हालसम्म सार्वजनिक गरिएको छैन।