काठमाडौं । श्रम संस्कृति पार्टीका अध्यक्ष हर्क साम्पाङले पूर्वमन्त्री सुदन किराती पार्टीको खम्बा बनिसकेको दाबी गरेका छन् ।

साम्पाङले एकपक्षीय रूपमा वार्ता समिति भंग गरेपछि किराती समूहलाई पार्टीमा प्रवेश गराउने प्रक्रिया रोकिएको विवरण सार्वजनिक भइरहँदा अध्यक्ष साम्पाङको यस्तो प्रष्टीकरण आएको हो । किरातीलाई ‘गौरव’को रूपमा साम्पाङले अथ्र्याएका छन् ।

उनले बुधबार सामाजिक सञ्जालमा भने, ‘सुदन किरातीज्यू श्रम संस्कृतिको खम्बा बनेर जोडिसक्नु भएको छ । यो त्यो भनेर अफवाह नफैलाउनु बेकारमा । हि इज आवर प्राइड ।’

किराती प्रगतिशील लोकतान्त्रिक पार्टीबाट केही साताअघि साधारण सदस्यसमेत नरहने गरी राजीनामा दिँदै अलग भएका नेता हुन् ।

पूर्वपर्यटनमन्त्री उनले उक्त दलको अध्यक्षमण्डलको एक सदस्य छँदै गत २१ फागुनको निर्वाचनमा सुनसरी–१ र भोजपुरमा श्रम संस्कृति पार्टीलाई सहयोग गरेका थिए ।

चुनावी तालमेललाई भविष्यमा हर्कको दलमा किराती जाने आधारको रुपमा कतिपयले विश्लेषण गरेका थिए ।